U Prime Minister warim ka Japan, u Shinzo Abe da khlaad noh u ynne hadien wa chah siat u ynne hi heipor wa dang e u yei klam paidbah ha chnong Nara du ar sngi chwa ka National Election.
Ya u Abe da siat ya oo da uwi u bru wa em 41 snem i rta heipor 11:30 i step heipor wa dang klam u hakhmat ka Kintetsu Railway Station wei da pat u khnep hadien wa chah siat u ym duna ar sien.
Ki pulit da kem ki ya u Tetsuya Yamagami uwa naka chnong Nara uwa da suba toh uwa da emkti heini wei da jooh man u lehkam u dkhot ka Maritime Self-Defense Force.
U Abe uwa da man kam u Prime Minister hadooh u snem 2020 da toh kuli u na rdang wa ha liang tidiang i rupai u.
Yei daw wa chah siat u Abe ym pu tip khamtam ha Japan wa khor bha ki aiñ wow yoh u thied suloi heiwa kiwa sakhi da ong ki wa ka suloi wa pynemkaam toh kawa ood kam u bomb wei da mih leh i tdem rong lieh wei em leh i sma wakhor wei da yoo lakam ka suloi wa da chna hi.
U Abe toh uwa da man kam u Prime Minister ka Japan ha u snem 2006-07 wei da yoh u wow man Prime Minister biang ha u 2012 tangwa da hiar chuki u hadien 8 snem neidaw wym chait u.
Ya u Abe da kha ha ka 21-09-1954.
