U tre kamjooh uwa man leh kam u Executive Director ka Wagh Bakri Tea Group uwa tip kam u Parag Desai (49 snem) da khlaad noh u hadien wa mynsoo neibynta i khlieh neidaw wa oor u heipor wa chah kdong ha ki ksaw yaaw ha i chnong Ahmedabad, Gujarat.
Ini da jia i heipor wa dang mih u na yung u wa em ha Ambali yow lai baam la-ær dei janmiet tangwa da em ki ksaw yaaw wa khlem tre kiwa da kdong oo ha ka 15 tarik wei heipor wa yut na kini ki ksaw da oor noh u wei da takha u deiwa joor neibynta i khlieh u wei da kit ya oo cha Shalby Hospital wei hadien da kit cha Zydus Hospital yow pooid ya oo tangwa da khlaad noh u ha ka 22 tarik neidaw wa joor mih snaam i jabieñ.
Chooh chooh ka Shalby Hospital da ong ko wa ym em kha dak wa chah dait u ha ki ksaw wei ye u man wa oor u deiwa yut ya ki ksaw wa kdong oo. Da pyntip ki leh wa kani ka Hospital da yoh ko boon ki bru wa wan phah sumaar neidaw wa chah dait ha ki ksaw yaaw.
Ya iwa jia da yoo da u Security Guard i yung wa sah u Desai wei kat u pynpoi oo cha Hospital ym em yong bru de u wei manda leh CT Scan da chem wa da lang snam hei jabieñ wei da em leh i bynta wa da chah ktah joor bha.
Ka Wagh Bakri Tea Group toh kawi na ki karkhana wa dai slacha wa heh ha India kawa em ha palat 12 tylli ki jylla ka ri wei krehkaam ko leh cha baar ri wei da antaad wa kawa pynmih hadooh Rs. 2000 klur chi snem.
Kiwa chong chnong leh da pynsñiaw ki yei sñiawkhia yei boon ki ksaw yaaw kiwa da yoo maa tangwa da em won kiwa da mih chakhmat wow yada ya ki ksaw deiwa ong wa ki boi leh maya donhi kini ki ksaw ym em mut ki wow dait ya u Desai.
Discussion about this post