U khynnah wa dang 4 snem uwa yoh COVID-19 ha Arunachal Pradesh da khlaad u ynnin ka sngi yow pynpoi leh ya kiwa khlaad na uni u khñiang cha ka 21 ngut.
Uni u khynnah toh uwa na Chimpu, Itanagar wei da khlaad u heipor 11:15 i miet. Ya uni u khynnah da wan li booh cha thaw sumaar heipor 9:28 i miet ka 6 tarik uni u bnai. Wei da khlaad u deiwa yoh Septic Shock, uni u khynnah leh toh uwa chitom na Cerebral Palsy uwa khairiñ, duna snam wei duna i baam.
Ynnin da em leh 260 ngut kiwa dang yoh COVID-19 ha Arunachal iwa da pynpoi ya waroh kiwa da dep yoh COVID-19 cha 11267 ngut.
80 ngut na ki 260 ngut kiwa dang yoh thymme toh kiwa Itanagar Capital Complex, 65 na Papumpare, 24 na East Siang, 21 na West Siang, 14 na Tirap, 10 na Changlang, mar 7 na Lower Dibang Valley wa Dibang Valley, 6 na Kurung Kumey, 5 na Namsai, 4 na Upper Siang, 3 na West Kameng, mar 2 na Lower Subansiri, Lower Siang wa Leparada, mar 1 na Tawang, Lohit wa Siang.
Ynnin da em leh 434 ngut kiwa dang chait.
Na waroh 11267 ngut kiwa da dep yoh ha Arunachal, 2850 ngut toh kiwa dang em ya uni u khñiang, 8396 ngut kiwa da chait wa 21 ngut kiwa da dep yap.
Da dep Test leh ya 2,57,924 ngut ki bru.
