Jowai: Ynne ka sngi heipor 9:30 i step ka wi ka kari Chevrolet Beat kawa wan na Shillong da tyrrah ko yei chram wa em ka Forest Beat House, Mookyndur, iwa mut kani ka kari da dong ko cha liang tymmun.
Ki paidbah da mih ki wow pynkhai ya ka kari kawa da kylla dei chrooh wei da kit ya uwa yah uwa em samen da ka Ambulance yong ka chnong cha Jowai Civil Hospital, Ialong wei hadien won da kit ya oo cha Woodland Hospital, Shillong wei khlaad u hei janmiet heipor 4 waje. Da tip pyrtuid ya oo kam u Goodbreeding Pala na ka chnong Tongseng (Sutnga), East Jaiñtia Hills.
Ki tre chnong ka Mookyndur da chim ki da ka phone yong uni uwa yah kari wei da pyntip ki cha kiwa ha yung yong oo.
I daw wa em kani ka kari artylli ki number plate toh wa u tre kari da yaleh thymme u da ka yong ka East Jaiñtia wei ym pu em looid u ya kiwa rim ki number.
Ha iwi tawan i jia ha Tuber Kmaishnong ka wi ka kari Mahindra Gio da noh ko cha rood sarok (Internal Road) hei miet yong ka 25 tarik.
Ya ki le ngut wa em hapoh kani ka kari da kit cha Civil Hospital, Ialong.
Ka kari toh kawa em ya u number ML05 J 3928.
Discussion about this post