Ynne i step ka 16 tarik heipor kamwa 9:00 waje da em i ya tyrrah kari iwa da jia ha Pommura ha u sarokbah Shillong-Jowai hapyrdi kawi ka kari Scorpio ka yong sorkar wa pynemkaam da ka Meghalaya State Rural Livelihood Society Department kawa em ya u Number ML01-7830 wa yah da u Lurshai Syiemlieh (34 snem) uwa na Lumparing Lum Dorbar kawa wan na Shillong yow lai cha Jowai.
Manda poi ha Pommura, kani ka Scorpio da ya tyrrah ko mar dei khmat wa kawi ka kari kamai (Swift Dzire) kawa em ya u Number ML-05L-8215 kawa yah da u Kamni Siangshai (32 snem) uwa sah ha Khliehtyrshi, Wah Lama, West Jaiñtia Hills heiwa waroh ki ar tylli ki kari da chah ktah ki.
Uwa yah ya ka kari kamai wa kiwa chong hapoh kitæ u Regan Kharlor (31 snem) uwa na 3rd Mile Upper Shillong (uwa man leh ka u Home Guard Volunteer ha Madanrting Traffic Branch Shillong), u Arki Salahe (30 snem) uwa na Caroline Colony, Jowai, u Markus Nongrum (52 snem), ka Mandakaru Dkhar (27 snem) kawa na Ummulong Dong Mihngi da mynsoo ki wei da kit ya ki cha Mawryngkneng PHC.
Ya ka Mandakaru Dkhar da pynlait hadien wa yoh First Aid tangwa ya u Markus Nongrum da pyntip da ki Doctor toh uwa da khlaad chwa wow poi hei thaw sumaar. Ya kiwi da phah cha Civil Hospital Shillong yow yoh ki yei sumaar.
Kiwa hayung uwa khlaad ym em da kwah ki wow leh ya ka Post Mortem heiwa da yoh ki leh ya ka hukum na u R. Wahlang District Executive Magistrate East khasi Hills, Shillong yow pynlait yei leh Post Mortem, kamtæ da ekti noh ya uwa da khlaad cha kiwa hayung hasem yow pyndep ki ya ka niam ka rukom.
