Ynnin i miet ka 24 tarik ki 8 ngut ki mistri wa kreh ha ka St. Xavier’s Girls Hostel, Umoid, South West Khasi Hills da chah dat ki ha ki damok kiwa ym tipmit hadooh wa hap pynkit ya ki cha Civil Hospital Shillong wow yoh yei sumaar tangwa hadien kattu katni kynta da khlaad noh uwi neidaw wa mynsoo joor u, wei katni ki 7 ngut dang em ki hapyrdi i chah sumaar.
Neiliang ki bor ka skur da pyntip ki wa chwa wow wanrah ya kini ki wakreh, da yohbor ki na ka sorkar wa na u montri rangbah ka jylla wa kamjooh na u montri ka chnat aiñ wa ki kaam pohyung ka jylla wa pait leh yaka chnat puræ puthi wa emkaam wow wanrah bru na baar jylla wow kreh ya ini i kaam.
Chooh chooh ki bor ka skur da yachem ki leh ya kiwa kitkaam ki seiñbhalang kam ka KSU wa HYC hajrong i daw wa emkaam ya kini ki mistri kiwa da biang lut ya ki kot ki sla wei da bood leh ya ki kyndon ka aiñ kamjooh da yachem leh wa u DC wa kiwa pynlai chnong yow lait kini ki wakreh na iwon iwon i maa.
Neiliang kiwa pynlai skur ka St. Xavier’s da ong ki wa kwah ki wow e chakri ya ki khynnah ka thaaiñ wei wow yada leh ya kini ki wakreh wei ym toh iwa leh ki yow chna poisa lane wow yoh nong.
Da ong leh wa neiliang ka skur lada em ha iwon iwon i por wa leh ko iwa ym toh dei leh chynnam iwa poi cha iwa bakla, ka skur man ko kawa smat wow paanmaap wei wow pynbiat ya iwa bakla, tangwa i pynemkaam dei bor toh iwa ym ye u pdiang yow pynbait ya iwon iwon iwa eh hadooh wow booh yei mynsien ki bru hei maa.
Kamtæ neiliang ka Managing Committee da pyntip ko leh cha ka Education Council of the Jesuit Society for North East India wow sangeh noh i kreh ha kani ka thaw wei wa u sangeh noh leh u pynman ya ki Class kat wympu pynbait yeini waroh.
