Katkam ka yutip wa da yoh na ki pulit da ong wa ynnin i janmiet ka 11 tarik heipor kamwa 5:45 da em i jia wa sñiawsih heiwa kari ka Scooty wa em Number ML-04D-2601 ya kawa da yah da u Erickson Lamare (17 snem) na Salaroh, Jowai wa ar ngut kiwa chong ha ka ya kiwa kynthup ya u Messiah Timung (16 snem) na Moosalyngkat, Jowai wa u Stevenson Suchiang (23 snem) na Dongmihsngi, Jowai da wan ki na Nangbah wow lai cha Jowai.
Manda poi ki ha Lad Nangbah da yatyrrah ki wa kawi ka Tata Sumo (Tourist) kawa em u Number ML-11-1969 ya kawa da yah da u Independence Nongtdu (41 snem) na Sutnga kawa wan na Jowai yow lai cha East Jaiñtia Hills.
Ha ini i jia ki le ngut kiwa chong ha kani ka Scooty da mynsoo ki wei u Erickson Lamare da khlaad noh u.
Ya u Messiah Timung da kit noh cha Shillong katwa u Stevenson Suchiang won da kit ya oo cha Woodland WK Hospital, Jowai.
Ya i metyap u Erickson da ekti noh cha kiwa hayung hadien wa da leh yeiwa emkaam.
