Da: U Soolangki D. Laloo, Loomkyrwiang, Jowai
Ynne ka sngi wow sah kynmoo
Yow khlawait ka ri, u khon wa khroo.
Wa yieñ yaleh neibynta ka ri
Yow lait nei broo, ha u mynder sepsngi.
Kiang Nangbah toh du me donhi
U nongialam wa chlur ka ri.
Satar hei man, satar hei kaam
Dap chynrang hei ktien, dap chynrang hei klam.
Nongyaleh wa sakhiat kam me!
Ha pyrthai cheiwon u chem wande
Wym suk du wow pait wow chong klikti
Yei chah lehbieñ ki khon ka ri.
Yootieñ won u pait ha ka juk katni
Hiar dor i man nongialam ki khon ka ri.
Boon sa du ki Dolloi tyngker
Wa khia i pyrkhat, stiñ kam u sder.
Kiang Nangbah ha u dieñ pasi
Yap neibynta ka jaitbru ka ri.
Nongialam won ka juk katni
Pyrkhat sa du yei pran samen donhi.
Ki rood ki kiar ki khon ka ri
Yaam, kiad, miet, step, synyaaw wa sngi
Nongialam da khlot, da thlah hawa pait
Ya ki wapli da ieh lyngkdang, syngngait.
A ileh wa jia wa man kamni
Ya ki nongialam ka ri yong i
Dait-thah i sñiaw ki hadooh katni
Pyn yei doh i snaam yong ki dahi.
A khon ka ri, khutlang O ya phi
Kat dang biang i por to pyrkhat, to sylli.
Ham ya ang hi-eh yeiwa thaba
Ya samboi u sepai ki khon ka Ri Jaiñtia.
Discussion about this post