Da pynkut noh ya ka North East National Service Scheme (NSS) Festival wa san sngi ha NEHU Shillong ha ka 23 tarik uni u bnai heiwa ha ka sngi pynkut da kdaw yei daw wym yoh ki khynnah u chimbynta na ka jylla Manipur neidaw i awri awra.
Hawa klam pynlai ya kani ka yalang, uwi na ki Program Officer ka NSS, u Conrad M Pariat da batai u hajrong i thmu wa pynman ya kani ka yalang wa san sngi ka wow pynmyntoi ya ki khynnah i wow sikai wow myntoi ki chi rta.
U Dipak Kumar, Regional Director, Regional Directorate NER, Guwahati, da pynkynmoo u wa katkam ka National Youth Policy kawa kynthup ya ki khynnah khynroo khyllood kiwa em hapyrdi 15-29 snem, da khana u wa i em ki khynroo khyllood kiwa em hapyrdi ini i rta em ki 40 klur tam ye ki wow kreh yow myntoi ka ri na ki.
Da pynchlur u ya ki khynnah wow em ki i kitkhlieh wow pynemkaam ya i sap wa em ki wei wow lai ki katkam ki rukom wa toh khnang wow myntoi ka imlang sahlang wot ha ka pateiñ wow wan.
U Vice Chancellor ka NEHU, u Prof. P.S. Shukla, uwa man u Chairman ka NSS University Advisory Committee, da pynyoo u ya ka bynta yong ki khynnah NSS Volunteer hei wow wanrah yei kylla ha ka imlang sahlang deiwa e kti ki ya idæ wow chakri ya ka chnong ka thaw lyngba ki kaam wa boon kam wow e snaam sñiawbha, wow hikai ya kiwa da san da heh, wow yada ya ka rym-aw wa kiwi kiwi.
U Montri ka chnat puræ puthi ka jylla u Rakkam A. Sangma, hawa klam kam u kongsan ha kani ka sngi da ong u wa i sdang ya iwon iwon i kaam man i iwa jop wa mar chiteiñ tangwa emkaam wow pynkut bha ki.
Ya kani ka yalang da pynlai da ki NSS Programme Officer na ki College waphær waphær kiwa em ha ka Organising Committee hapoh i yahkhmat u Dr. M.M. Khymdeit Programme Coordinator NSS Cell Nehu, u State NSS Officer u F. Rumnong uwa man leh u Nodal Officer.
Ha kani ka sngi da pynlait leh ya ka Souvenir wa pynkhreh da ka Editorial wa ka Media Committee hapoh i yahkhmat u Dr. Kamailang Nongmalieh.
