U MLA ka Jowai, u Wailadmiki Shylla hawa yaklam wa kiwa thoh khubor ynne, da ong u wa ka Jowai Municipal Board ym em chong ngiah ko wow thooh yei thaw noh jhep wa pura namo ka Permanent Site ka yow chna leh hei rukom ka juk wa katni wa dei stat wa katni.
Da ong u wa iwa eh toh wym e ki bru yei thaw heiwa manda em leh kiwa e yei thaw da mih i pyrchah na kiwi wei da em leh hadooh wa chah beh chnong kiwa kwah wow e yei thaw deiwa pynrap wa lada ym e yei thaw kammon ka sorkar u ye ko wow booh ya ki kor wa ki tiar ki tar yow leh yeiwa emkaam yei jhep.
Da ong u leh wa da em ki thaw wa pait ki katni tangwa ym ye u wow khana neibhah ini wadep mar ya tip wa em i thmu wow noh yei jhep, em wot kiwa wan wow pynchoi ya kitu kiwa em yei thmu wei ym kwah de wow leh yei jooh iwa da bakla wei wow chaniah leh ya ki bru kiwa kular wow lai noh yei jhep tangwa da noh hi-eh ki cha rood ki um ki wah.
Da ong u wa kawi ka laad toh wow yabhah chwa yei jhep hapyrdi kiwa pyut wei ki wym pyut heiwa dadep leh wow saam ya ki tadong noh jhep kiwa em rong suiñbneiñ wa ki rong yirngam tangwa sñiawsih won u wa ym em lai pynman ya ki pynsñiawthooh paidbah wow leh yeini iwa da pynsah khlem pynemkaam ya kini ki tadong pynlang jhep.
Chooh chooh da ong u wa lada ye u yabhah yei jhep, kiwa hoi u thang daw e cha ki karkhana kiwa da bait wow chim yei jhep. Hawa kylli won yei pyrchah ki paidbah yei thaw thang jhep ka Dalmia hadooh wa hap u khang, u Wailad da ong u wa i pyrchah toh neidaw wa i jhep toh iwa wan na baar jylla.
Da kdaw u leh wa nadooh wa man u MLA da chimkhia u ya ini i kaam wow thooh thaw noh jhep neibhah da man i iwa sahteiñ la 27 snem nadooh wa seiñ ya ka Jowai Municipal Board wei i thaw wa em ha Mynkjai leh ym toh iwa man neibhah em i pyn harood ka wah.
Da ong u leh kiwa pyrchah hawa kylli yei daw da ong bait ki wa ym leh katkam ka juk wa katni tangwa neidaw wym e won ki yei thaw da man ko iwa eh wow pynyoo wa ye sakhiat u pynbiang ya ki kor wow leh kamwa da kwah ki paidbah.
