Ka Khasi Students’ Union Wapung Circle da lai booh ujor ko ha u Deputy Commissioner ka East Jaiñtia Hills District, u Shivansh Awasthi, hajrong i leh habra ka Purvanchal Buildtech Private Limited (PBPL) kawa pynkreh ya ki luti lai kjat wa ki dooid wa em ha tymbud u National Highway-6.
Ka seiñ da ong ko wa ha ki thaaiñ Wapung da ieh khlem da tymmoh ya u dooid wa em ha rood sarok wei yei kreh da sdang nadooh u September tangwa da ieh khlem da pyndep iwa da booh hei maa ya kiwa lai wa wan heiwa da em kawi ka tymmen kawa dadep oor wei kawi ka thuk-thuk leh da liat ko ha uni u dooid hadooh wa sahkut.
Najrong wa khlem pyndep yei kreh, da ieh leh yeiwa tam khlem da pynlang pynlum iwa da pynthut wei pynwit chooh chooh ya kiwa lai wa wan.
Ka seiñ da e ko leh ya ka ujor wa da booh da u khon ka men kawa da haap hapoh uni u dooid ha ka 19-09-25 hadooh wa da mynsoo deiwa kyntu leh ya u DC wow hiar lait pait dei langær ya kini ki dooid yow pyntikna da tymmoh ki yow lait u jia kamni iwa sñiawsih.
Neiliang u DC da kular u wow chimkhia wei wow phah ya ka PBPL wow pynchna ko yeini deiwa e por chi tayaaw tam wei lada ym pynchna neiliang ka seiñ daw chim ko da kiwi won ki laad.
Discussion about this post