Ka Dorbar Chnong Umkiang, East Jaiñtia Hills, ynne da thoh ko cha ka sorkar jylla lyngba ka yung krehkaam u District & Medical Health Officer heiyatoh wa i man i long ka Umkiang PHC wa i duna wa em ha kani ka thaw sumaar.
Ha kani ka thaw sumaar da chem wa pai ka um na saad, ka tin sap-yung leh da pai ko kam ha ki kamra sumaar, i kamra Doctor wa kiwi kiwi wei da chem wa kaad i chram wei da piah ki dwar wa ki khian-dwar.
Ya kani ka PHC ym em de u ñiaam rong da boon snem wei ki pyllong leh da sih ki kamjooh ki tusok kiwa da tngit wei da rim.
Ym em i dawai Formalin ha ka PHC khamtam heipor wa em wa khlaad wei wow kit ya ki metyap cha ki chnong wa jngai.
Sa iwi wa chem chitom bha ki paidbah ha kani ka thaw sumaar toh iwa ym em Doctor MBBS heiwa da em du ki Doctor Ayurveda iwa emkaam wow pynbait noh wut-wut.
Ka chnong da kyntu ko ya ka sorkar wow chimkhia ya ini i emkaam waroh nadooh wow chna pynmiat ya kani ka thaw sumaar ha ki thaw wa da sih da jæd da pai, wow pynbiang ya ki Doctor wa kiwi kiwi.
Heijooh i por da kyntu leh wow pynku kyrdan noh ya ka Umkiang Primary Health Centre cha ka Community Health Centre (CHC) neibhah wa kani ka thaw sumaar chakri ko ya ki 16 tylli ki chnong wa em palat 15,000 ngut ki bru wei kawa e sumaar ya ki paidbah ka thaaiñ khappood wei da emkaam wow pynjanai noh ya i rukom e sumaar yong ka neibhah wa boonsien ki bru chah pynbor ki wow lai cha thaw sor wow thooh ya ki dawai dachin.
