Jowai: Ka Voilet Lyngdoh kawa man ka MDC kynthai wa samen hapoh ka Jaiñtia Hills Autonomous District Council (JHADC), ynne ka 13 tarik da chah jied ko kam ka Deputy Chairman yong ka Council hapoh ka dorbar kyrpang wada khut da u Chairman, u A.H. Darnei khlem em wa yaleh pyrchah ya ka tangwa dei mynjur lang yong waroh ki MDC hapoh i yahkhmat u M.B.Rymbai kam u CEM.
Neiliang u Chairman da pynbna u wa lyngba ka Nomination Paper wada file da ka Voilet Lyngdoh neibynta u yakhun ya ka chuki Dy. Chairman, da tyrwa da u Rioo Sten, u Sevenborn Tang, wa ar won da tyrwa da u Laitsing Shylla wa u Hermon Phawa, wei hadien wada dep bichaar bniah ya ki kot ki sla nadong chadong da chem wa man ko kawa biang, kamtæ da jop suk ko khlem em wa yaleh pyrchah.
Hadien wa dadep pynbna, ki MDC wa kynthup ya u Moonlight Pariat, u Holando Lamin, u J.R Pyrtuh, u Chemhok Garod, K.M.Lytan, u Dy. CEM u Lamdibok Sumer wa u CEM u M.B. Rymbai da e ki yei kyntien eh bok eh nasib ya ka hei lai luti wa chaphrang wei da ong ki leh wa kani da man ka kaam wow sah kynmoo (History) wa nyngkong dooh hapoh ka Council neibhah dang du ka donhi ka kynthai wa nyngkong dooh hapoh ka Council wow ksoh ya ka chuki Dy. Chairman.
Heijooh i por ya ka Voilet da synraan da u Dy. CEM u Lamdibok Sumer wa kiwi ki MDC yow li chong ko haka chuki Dy. Chairman hapoh ka dorbar.
Kamtæ neiliang yong ka leh da e ko ki kyntien e khublei ya waroh ki dkhot ka yung dorbar wa da e ki i kyrchaan wa pura ya ka yow chong ko ha kani ka chuki, wei da kular ko wa neini chakhmat u pyrchang ko u kreh ki kaam wa bha tam neibynta ka Council khlem iwon iwon i chah chiliang.
Kam wow pynkynmoo ka chuki Dy. Chairman da thylli ko la kamwa chi snem tam kattu hadien wada ieh noh u Hopingstone Bareh ya kani ka chuki.
Discussion about this post