Ka EJNC kam chibynta wow booddien yei dawa yong ka seiñ wow sylli ya ki kot ki sla yong ki Truck kit mooyong wa wan na baar jylla chapoh ki karkhana pynmih khyndaw-bilat (Cement Factories) khamtam ya kitu ki wym pu yoh yohbor (Approval) na ka Mining & Geology Department ka Meghalaya.
Kamtæ ka seiñ ha ka 9 tarik uni u bnai da yachem biang ko wa u DC ka East Jaiñtia Hills District wow paan pyche na oo iyi wa da leh ka yung krehkaam u heiyatoh waka ujor ka seiñ wa da dep booh ko nadooh ka 06-04-2023.
Hei yaklam wa ki heh yong ka EJNC, neiliang u DC da pyntip u wa da dep thoh cha u Division Mining Officer (DMO) heiyatoh wa ki dawa yong ka seiñ heiwa neiliang u DMO da klam che u wa toh ka yung krehkaam ka DMR chem chitom ko wow sylli ya kini ki Truck kit mooyong wa wan na baar jylla neibhah wym em dæ ka Checkgate/Weighbridge yong ka DMR kawa jooh em ha Umtyra.
Kamtæ neiliang ka seiñ da kyntu ko ya ka sorkar wow pynkrehkaam biang ya ka Weighbridge kawa em ha Umtyra khnang wow yoh u ye u kdoh ya kini ki Truck kit mooyong kiwa wan pyrchah aiñ na baar jylla chapoh karkhana kiwa em hapoh East Jaiñtia Hills District.
