Hadien wa da lai ka takit hajrong i pdung Bomb IED iwa da jia ha Them Ïewmawlong ha ka miet yong ka 9 tarik uni u bnai, u Superintendent of Police (SP) ka East Khasi Hills, u Rituraj Ravi da ong u wa nei takit ki pulit da chem kse wa boon kiyi kiyi, wei da maham u ya kiwon kiwon kiwa emkti, kiwa ya krehlang næ kiwa pyndap poisa heiyatoh wa i tympdung Bomb deiwa pynrap wa ka aiñ daw leh ko deiwa eh.
Da ong u wa ki pulit dang tih bniah bha ki katni yei kyrchaan poisa neibhah wow leh ya kini ki kaam pyntieñ kam i tympdung Bomb khlem ka poisa næ kiwa pyndap poisa toh ka wym ye u leh, wei i yoh poisa wow leh ya ki kaam pyntieñ toh kawi na ki takit kawa ki pulit dang tih bniah bha ki.
Da ong chooh chooh wa lada chem ya uwon uwon wa emkti wow e poisa daw kheiñ ya ki kam kiwa emkti lang wa ki seiñ kieñ suloi wei daw pynchitom ki katkam ka kyndon ka aiñ Unlawful Activities (Prevention) Act (UAPA).
U SP da ong u wa lada em kiwa chah dawa poisa toh u pyntip ki cha ki pulit wei lada ym pyntip wei su ki yaka poisa, daw kheiñ ya ki kam kiwa emkti wow ya krehlang.
Uni u heh pulit da khana u wa ka takit da chem ko leh wa ka seiñ Hynniewtrep National Liberation Council (HNLC) da pynemkaam ko da ki kor Technology wa ki Social Media yow thong ya ki khynroo yow leh ya ki kaam pyrchah aiñ yong ka seiñ.
Neiliang u SP da kyntu u ya ki khynroo wym toh u ngop ki ha kam kini ki chah thong pynbiej wei wow kiar na kiwon kiwon kiwa yatoh waka seiñ kawa da chah kheiñ pyrchah aiñ wei kamjooh ha ki kam pyrchah aiñ. Da ong u leh wa ki pulit biang ki ya ki kor Technology wow yakhun pyrchah yei thmu yong ka HNLC.
Discussion about this post