Ka Raid Laban Sports Social and Cultural Club deiwa kyrchaan lang u MLA ka South Shillong, u Sanbor Shullai da pynkup burom ki ya 6 ngut ki khynnah kiwa kyrpang i doh i pran, kiwa man ki khynnah wa pnah ha ki kaam yalehke wei daw mihkhmat ki ya ka jylla waka ri wei kamjooh kiwa da lehbha ha ka Exam SSLC wot hapyrdi i wym biang i doh i pran.
Kini ki khynnah toh kiwa na Fernando Speech and Hearing Centre, Umïam Ri-Bhoi District, na Bethany Society, Shillong, na Jyoti Sroat School, Shillong wa na Lumparing Vidhyapeeth Secondary School, Shillong.
Ha kani ka pynkup burom wa kyrpang, neiliang u Sanbor Shullai kam u kongsan da e u da ka tulop kawa chi bnai cha kitai ki khynnah, khlem da kheiñ wa toh kiwa na kawon ka chong, ka thaaiñ næ Constituency, heiwa da pyntip u wa ka tulop ka yong u MLA man ko Rs. 2,30,000 wei na kani ka tulop da pynbna u Rs. 1 lak cha ka Phriska Pyngrope na ka skur Bethany Society, wei kani ka khynnah daw lat mihkhmat ko ya ka ri India yow chimbynta ha ka lympung World Arm Wrestling ka wow man ha Maldova, Europe.
Neibynta ki 4 ngut wa kynthup ya u Skhemlang L Nonglait na Umlatar, Ri-Bhoi District, ka Syrpailin Wahlang na Nongritong, Nongstoin West Khasi Hills, u Novenius Roiki Dkhar na Madan Mynsoo, West Jaiñtia Hills wa ka Aisilda Thabah na Mawphansin, Nongstoin West Khasi Hills kiwa mihkhmat ya ka jylla ha ki yalehke waphær waphær, u MLA da e yarap u mar Rs. 20,000 yow pynchlur wei kyrchaan ya ki ha ki kaam yalehke.
Da em leh kawi ka khusnaam wa kyrpang kawa Rs.20,000 wa da e cha ka Ankita Das na Lumparing Shillong, kawa da yoh palat 89% ha ka Result SSLC hapyrdi i chitom i doh i pran.
Discussion about this post