Ka yalang wa da khut pynman da ki ar bor District kitæ ka West Jaiñtia Hills wa ka West Karbi Anglong neibynta u klam yasuk hapyrdi ki jaitbru Pnar wa Karbi ynne ka sngi ha chnong Khanduli, ym em poi ko cheiwon cheiwon leh neibhah wa neiliang ki bru Pnar kwah ki wa ka Karbi Anglong Autonomous Council (KACC) u kyrriah chwa ko yaka khyrdop khrong dan wa tip kam ka Entry Tax Gate wa em hapoh ka chnong Khanduli.
Ha ka yalang wa da pynman ha BOP ka Assam wa da emlang da kiwa mihkhmat na ki jaitbru Pnar wa Karbi, neiliang ki bor District ka West Karbi Anglong da em u Assistant Commissioner and Border Magistrate, u Rakesh Thakur wa u Circle Inspector u Z. Baithanglangdi katwa na West Jaiñtia won da em u District Assistant Commissioner, u W.K. Kharbuli, MCS, u DSP (L/O), u A.J. Sangma wa u B. Sungoh BDO Namdong C&RD Block.
Chwa wow sdang i yaklam hapyrdi ki ar jaitbru, neiliang ki sahep yong ki ar District da pynche ki yei thmu yong kani ka yalang wa toh u klam bait thij neibynta u wanrah yei chongsuk chongsaiñ ha ki thaaiñ khappood hapyrdi ki ar jaitbru khnang wa i lai i wan i kamai kajih u man ko kamwa jooh.
Hadien ka yalang neiliang ki jaitbru Pnar pyntip ki wa daw yang ki hadooh waka KACC u phah ko da ka chithi wow pyntikna wa da kyrriah ko ya ka Entry Tax Gate na Khanduli, wei hadien ite wot i lai i wan leh u man ko kamwa jooh.
Heiyatoh won waka rai wow chong yalang biang neibynta u yaklam ya kani ka jooh ka phang, ong ki wa man kiwa smat ha iwon iwon i por wa pynbait da ki bor District.
U Pyrkhat Myrphet uwi na kiwa mihkhmat ya ki Pnar ynne da khana u wa neiliang yong ki leh daw lai yachem ki wa ki MDC yong ka JHADC yow pynbor ya ki u klam ki wa ki bor ka Karbi Anglong Autonomous Council hajrong u pynsmat kyrriah ya ka Tax Gate khnang wa i chongsuk chongsaiñ, i lai i wan, i rep i riang u man ko kamwa jooh.
