Ka Assam Pollution Control Board ha ka 22 tarik uni u bnai da pynmih hukum ko wow khang yei thang bomkala ha waroh kawi ka jylla lait noh kitu ki wym ktah ya ka rymaw deiwa pyrkhat leh yeiwa daw lehkmen Diwali wa kiwi de.
Ya ki bomkala wa chah u pynemkaam daw chah wow thang du ar kynta heipor ka Diwali itæ nadooh 8:00 waje i miet hadooh 10:00 waje i miet katwa heipor ka Chhath Puja daw chah u thang nadooh 6:00 waje i step hadooh 8:00 waje i step katwa hei miet chwa wow poi ka Christmas wa hei miet chwa u sdang u snem thymme u chah nadooh 11:55 i pyrdi synyaw hadooh 12:30 i step synyaw.
Ini da wanrah ko leh ya chiboon i thlai na ki paidbah ha ki Social Media.
Ynne neiliang u Montri Rangbah ka Assam, u Himanta Biswa da ong u wa ka Pollution Board da leh ko yeini khlem da yaklam chwa wa ka sorkar hawa pynmih ya ka hukum yow khang yei dai wei thang bomkala wa kiwi de ki kyndon.
Kamtæ da ong u wa ya ini daw hap chong pyrkhat biang deiwa pyrkhat leh yei sñiaw ki paidbah.
