Hadien kamwa chiteiñ bnai wa da sahkut i jhep ha Jowai khamtam ha ki thaw pynman yaw, ynne i step ka 6 tarik neiliang ka Jowai Municipal Board (JMB) da yoh ko wan kit yei jhep khamtam kiwa da lang kat u loom khian hajan ka yung krehkaam u DC ha Iawmusiang, Jowai, ha laad Thomas Jones College wa da chim dei jhep yei thaw pynyieñ kari kamai.
I jhep wa dang sah wym pu em dep wow kit toh iwa em ha i thaw pynyieñ kari ka Seiñ Raij Jowai wa em ha Iawmusiang wa ha Iaw Thymme. Dang sah leh sei wan kit yei jhep na yung ki bru.
Kam wow pynkynmoo wa ki soo chnong kiwa em chajan i thaw noh jhep wa kynthup ya ka Larnai, Thadmusem, Sohphoh wa Nongkhroh da dep ki wow chna ya ka Committee wei da pynman leh ya ka yalang wow chah yei noh jhep ka JMB ha i thaw wa tip kam i Moochutsdai hajan ka chnong Sohphoh.
Katwa neiliang won ka Elaka Nartiang Coordination Committee wa kynthup lang wa ki seiñbhalang kiwa da pyrchah nyngkong yeini i noh jhep dang em hi ki kattu katni wa pyrchah yeini, wei katkam wa pyntip u DC ka West Jaiñtia Hills ya kiwa pynthut da phah ya u SP wow leh katkam ka aiñ.
