U General Secretary ka Khasi Students’ Union (KSU), u Donald V Thabah da phah Wyrta u deiwa khor cha ka Vishwa Hindu Parishad (VHP), deiwa ong wa lada sñiaw ki wa em i kitkhlieh ya i man i long ka jylla, emkaam u khoom u kdoh chwa ya ki baar jylla wa ki dkhot ka VHP kiwa lai Rally, kiwa yieñ hakhmat yungmane kiwa kbai ya ki kyntien chit niam Jai Shree Ram wow pynchit ya ki paradoh parasnaam kiwa dang em ha ki yaseiñ.
Da ong u wa lada ka VHP ymye ko wow leh yeini mut i wa ka kani ka seiñ toh kawa neibynta i myntoi yong yi yong yi, deiwa pynrap wa ka KSU ym tieñ ko wei ym e laad ko wow pyndooh mynsien wei thombor ya ki paradoh parasnaam.
Kam wow kdaw heini wa ka VHP ha ka 2 tarik uni u bnai da thoh ko cha ka President ka ri, ka Draupadi Murmu wow tuklar heiyatoh wa i chah tynyap ki 2 ngut ki Dkhar ha ka thaaiñ Ichamati, wei kani ka seiñ da dawa ko leh wow thung takit da ki chnat ka sorkar pyrdi kam da ka CBI namo ka NIA wei da dawa leh wow e ya ka bai lutsan cha ka manyung ki ar ngut.
Hajrong ini, u heh ka KSU da ong u wa ka KSU ym jooh tuklar ko ya ki kaam yong ka VHP cha ki thaw Ri-thor, kamtæ ka VHP leh ymtoh u tuklar ko ya ki kaam hapoh ka Bri Ynniawtrep wei lada ka VHP kam ko wa toh kawa pait ya waroh kiwa chong chnong ka ri India, iwa phylla won wa heini ka VHP pait pathan ko du ya kiwa poi mynkna kiwa ymtoh ki tre ri hapoh ka jylla kiwa da yoh u man nong India da ki kot ki sla wei ini pynyoo ko wa em i rukom man wa ar maloi.
Chooh chooh da ong u wa ka VHP ymtoh ka seiñ na kani ka jylla, tangwa toh kawa na baar kamtæ ymtoh u tuklar ko ya iwon iwon heiyatoh wa i man i long ha ka Bri U Ynñiawtrep.
Discussion about this post