I khoom i kdoh ka sorkar ya ki le tylli ki nongbah, ka Shillong, Jowai wa Tura nadooh ka 1 tarik hadooh ka 10 Naisan yow khang yei poor ka khlam COVID-19, da wanrah ko yei sñiawkhia ya ki paidbah khamtam kiwa im sngi nei khih i kreh iwa yoh nong ki man-ka-sngi.
Ha sor Shillong hawa yaklam wa ki kattu katni ngut ki bru na khap ki paidbah, da pynsñiaw ki yei kyrchaan ya i rai ka sorkar neibhah da hap ngait bait ya ka deiwa ong leh wa ka sorkar toh u pyrkhat ko leh ya kiwa im nei mylla sngi deiwa e laad wow pynlai da ki Odd wa Even Number.
Uwi na ki bru waheh da ong u wa lada boon i mar baam ha yaw leh ym myntoi hawa ym em ka poisa wow thied ya ki mar neibhah wa khih mylla ki i sngi yow baam hei miet deiwa pynrap leh wa lada khang tæ emkaam wow khang ya waroh.
Da em leh ki manbei kiwa ong wa ka sorkar da dep ko wow rai, tæ ki ymye ki wow ong iyi iyi wei hap chah thngan wot ki wei kiwa em poisa u biang ki katwa ki wym em poisa daw yap thngan ki khlem wa e ya ki.
Kattu katni ngut kiwa kamai kari da ong ki wa lada khangsbak daw chem chitom ki neibhah wa boon ki kari toh kiwa chim ram donhi ki wei hap su ki ya ka man-u-bnai lada yoh namo ymyoh ki u kamai, da pynsñiaw ki leh yei pyrchah ya ini i rai ka sorkar neibhah wym maap ya ka bai kot kari.
Ini i rai ka sorkar ym krehkaam ko salonsar neibhah da chah ya ki kattu katni ki kaam wow lai bait ki ha kini ki 10 sngi, kam ki dukan mar baam næ tiar kiwa emkaam katkam wa chah ki DC wow wai wa i por wa ka sngi.
Tangwa kiwa chah ktah kattu toh kiwa chong chnong kiwa mylla sngi ha ki yaw ki haat wow dai khutia kamjooh kiwa kamai kari kiwa hap kit bru kiwa chah du ha ki kaam wa jhan wei itæ leh du chipawa neiwa jooh kit.
