Ha kini ki sngi da mih i sñiawthooh bakla heiyatoh wa u pood u ang hapyrdi ki ar tylli ki dorbar chnong wa kynthup ya ka Dorbar Chnong Panaliar wa ka Dorbar Chnong Chyrmang Neiñ khamtam hadien wa thmu ka Panaliar wow pynman ya ka Syntu Ksiar Musical Festival 2021.
Ini i sñiawthooh bakla da mih i hadien wa ki ar tylli ki dorbar chnong da kam ki wa i thaw wa thmu wow pynman ya kani ka tamasa em i hapyrdi u pood u ang yong ki wei ini i kaam da poi i wot chadoh ka yung krehkaam u Deputy Commissioner ka District.
Ynne ka sngi kiwa mihkhmat na kini ki ar dorbar chnong da yachem ki wow klam ya pynbait ya ini i kaam heiwa da rai ki pynarliang wow pdiang wow pynlai bait ya kani ka tamasa wei wow pynbait won ya u pood u ang hapyrdi ki ar chnong hadien wa leh ya kani ka tamasa.
Hadien i yaklam neiliang u waheh chnong ka Panaliar, u Riquoma Rq. Laloo da kyrmen u wa i kaam ka chnong u man i iwa lai bait.
Neiliang u Skhemki Dhar uwa man kam u Waheh Chnong ka Chyrmang Neiñ da ong u wa hadien wa yaklam ynne ka sngi neiliang ka chnong ym em de i wit ko wow pynman ya kani ka tamasa.
U Skemki da ong u leh wa neiliang ka Dorbar Chnong da kyntu ko leh ya ki paidbah na Ri-loom Khasi, Jaiñtia wa ka jylla leh waroh kawi wow wan cha kani ka tamasa.
