Jowai: Ka Dorbar Chnong Tympang Iawmusiang Jowai, hajrong ka thong wow wanrah yei khooid i jngiar hapoh ka chnong khamtam haki bynta wa man yaw, ynne ka sngi da chim ko yaka luti wow khut yaki waheh chnong waphær waphær ka Jowai, kiwa chong yaw, kiwa pynlai yaki yaw ki haat nadooh ka yaw CIN, yaw Chyiap, Seiñraij, ka yaw JHADC, ki seiñ yong kiwa kamai kari wa kiwi cha i pynkhooid chnong kamjooh leh i pynsñiawthooh hajrong i emkaam u pynman yaka Iawmusiang kawa khooid wa suba.
Haka yalang tbian chwa u sdang yei pynkhooid, u waheh chnong ka Tympang Iawmusiang u E. Shylla da ong u wa deilang u yakhun pyrchah yaka khlam COVID-19 uwa da poor ha kylleiñ ka pyrthai, kamtæ em haroh ki i sñiwkhia u pynman yaka yaw kawa khooid neibhah i bynta wa kongsan u yakhun ya uni u khñiang kjut toh i lehkhooid.
“Kamwa waroh datip wa ka Iawmusiang kawa em hapoh u pood u ang yong i toh ka dur yong ka ri-loom Jaiñtia kamtæ ym em kwah i wa ini i dur u man i iwa tngit kamwa jooh man, kamtæ yooluti wa kani ka sngi u man ka sngi i kyrmen wa dei ya krehlang yong waroh, i angnood u wanrah yei khooid u man kaam i,” ong u E. Shylla.
Heijooh i por kyrpaad joor u ya waroh ki paidbah wa chong yaw kamjooh kiwa wan yaw wow em ki i kitkhlieh, wym toh u leh tngit næ noh taroi yei jhep kamwa jia haki sngi wa dep wada em i noh taroi haki luti lai kjat haki dooid, ki rood sarok wada ktah yei dur i dar yong ka Iawmusiang, tangwa neini chakhmat u sñiawbha ki wow noh haki kari noh jhep ki wow em nadooh i por 5 waje i janmiet wei lada dang chem wa em kiwa noh taroi u chah pynchitom ki katkam ka aiñ chnong.
Neiliang u President ka Synjuk Waheh Chnong Jowai, u Alan Ñiangti da kyntu u wa kamwa chimkhia i yei lehkhooid haki yung ki sem ki chong ki thaw kamtæ toh leh u em i kitkhlieh hawa wan cha Iawmusiang.
Ki bru wa wan na baar hawa wan ki cha Jowai nyngkong hap yooh kjat ki ha Iawmusiang, lada kam kiwa chong yaw pynyoo ki yaka nongmuna wa bha kiwi leh wym yohsa ki wow bood.
Ha kani ka sngi ka Dorbar Chnong Tympang Iawmusiang da wah haroh ko yaki Banner haki luti lai kjat wada thoh hajrong i kordor i lehkhooid nalor wym hoi u dih sikret haki thaw paidbah.
Da kyntu haroh wow pynyakhlaad yaki jhep wa pyut wa ki wym pyut chwa u li noh haki truk ka Municipal, nalor wow sdang chwa leh yei lehkhooid na samen samen.
