Ka Dorbar Ki Waheh Kur Ri Jaiñtia kawa da seiñ hajrong ka yurim u pynneh pynsah yaka riti dustur wei u yada ya ka jaitbru, ini wa dep da lai booh ko i kyntu hakhmat u CEM ka JHADC wow tipmit noh da ka aiñ yong ka Council ya waroh ki kur ki jait wa em hapoh Ri Jaiñtia, neitæ wow booh leh ki kyndon wa emkaam u yoh NOC hawa pan Schedule Tribe khamtam ya kiwa chong kurim baar jylla næ ki wym toh naka jait kynja yong i.
Kamtæ neiliang kiwa yahkhmat ka Dorbar Ki Waheh Kur Ri Jaiñtia wa kynthup ya u President, u Khroo Lamsalanki Pariat, ki Vice President, u Pyrkhat Shylla wa u D. Donstan Khonglah, ynnin ka 23 tarik da pynbna paidbah ki wa ha ka 27 tarik uni u bnai heipor 11:00 waje i step daw em ka dorbar bah næ i yachemlang ki waheh kur waphær waphær wa kynthup nadooh ki President, Vice President, Secretary wa ki Executive Member yong ki Seiñ Kur Ri-loom Jaiñtia ha Yungwalieh ka Chilliangraij, Jowai kamjooh kiwon kiwon kiwa sñiawkhia ya ini i kaam.
Neiliang u K.L. Pariat pyntip u wa ha kani ka dorbar daw yaklam hajrong kammon u pynbait neibynta u pynskem wei pynneh pynsah yaka kur ka jait khamtam kawa hiar pateiñ na ka Bei, u yaklam leh hajrong i e kulmar ya ka Schedule Tribe kawa man kyrpang wei wow pynskem yei man kam ki jaitbru ri-loom.
Heijooh i por kiwa yahkhmat yong ki kur leh u tip noh ki yei kaamram wa i bynta yong ki iwa emyatoh wa ki aiñ ka sorkar pyrdi kamwa da e bor lyngba ka Sixth Schedule.
Chooh chooh da ong u wa ka dorbar ha katai ka 27 tarik u man leh ka dorbar wow sdang ya ka yurim yong ka mynried ka kur ka jait wa hiar pateiñ na ka bei, neibhah wa ha kini ki sngi da chynna yei chah tynjooh lyngba i wan psiah ki bru wa na baar cha ka thaiñ yong i.
Neitæ daw em leh ki bru chemphang wow e yei klam heiyatoh wa kani ka mat wa ileh emkaam u pynneh pynsah ya ka kur ka jait wa wan na ka bei.
Neiliang u Gremlin Bareh, Asst. General Secretary da kyntu joor u ya waroh kiwa yahkhmat ki kur waphær waphær wow wan ya chimbynta ki ha katai ka dorbar khnang yow yoh ya ki yumut wa biang.
Discussion about this post