Hadien wa ka seiñ Hynniewtrep National Liberation Council (HNLC) da pynbna ko wa da mih noh ko nei yaklam yasuk waka sorkar jylla wa sorkar pyrdi, neiliang u General Secretary cum Publicity Secretary, u Saiñkupar Nongtraw da pynbna u wa kiwa yahkhmat ka seiñ pdiang ki wow yachem wa u Deputy Chief Minister, u Prestone Tynsong wei yaka thaw daw pynbait da kiwa yahkhmat ka HNLC.
Hawa pynsñiaw yeini hapoh ha rynsan Facebook, u Saiñkupar da ong u, “Nga da phah ktien O cha u Prestone wa pdiang sñiawbha i yei tyrwa yong oo wow yachem wa kiwa yahkhmat ka HNLC ha kawon kawon ka thaw, wei i thaw daw pynbait da i lada thoh ha kawon kawon ka ri, u e i ya oo yaka Safe Passage, i wow pynbiang ka baam ka dih, ka thaw thiah, ka thaw dem wei u sumaar ya oo, kamtæ ym artatien næ tieñ i.”
Kam wow pynkynmoo wa ka HNLC ha u Kmaichonglad (Dec) 2023 da mih noh ko nei yaklam yasuk neidaw wym bien ka sorkar u pdiang yei dawa pyndam noh ya waroh ki mukotduma pyrchah ya ki dkhot ka seiñ kamjooh i pynbna ka sorkar pyrdi wa ka seiñ man ko kam ka seiñ pyrchah aiñ.
Hadien ini, neiliang u Prestone uwa pait leh ya ka chnat Kaam Pohyung ka jylla, da ong u wa ka sorkar kwah ko wow yaklam wa kiwa yahkhmat ka seiñ kiwa ye wow chim yei rai, wei ya waroh ki dawa yong ka seiñ leh toh u yaklam wa kiwa yahkhmat wa hakhlieh dooh ka seiñ.
U Prestone da tyrwa u leh cha kiwa yahkhmat ka HNLC wa lada ym sñiaw chngaaiñ ki wow wan yaklam waka sorkar ha Meghalaya, ka sorkar smat ko wow yaklam ha kawon kawon ka thaw wot cha baar ri, wei da ong u leh wa ka sorkar ha i yaklam yong ka kylla wa nyngkong leh ym em leh arsap, neibhah da pynpoi suk ya ki dkhot ka HNLC wei da lai booh leh deiwa suk.
Discussion about this post