Ka Hill State People’s Democratic Party (HSPDP) da pynkhreh ko neibynta wow yakhun ya ka Election MDC kawa daw man noh, wei neiliang ka Party lyngba ka Central Election Committee da khut ko ya ki kyrtong kiwa kwah wow yakhun yow wan ki chakhmat.
U President ka HSPDP, u KP Pangñiang da ong u wa ka Central Election Committee (CEC) da phah ko ya ki Unit wow phah yei pyrtuid yong ki kyrtong hapoh uni u bnai. Da ong u wa neibynta kitu kiwa kwah wow yakhun Election na ki Constituency wa ka seiñ ym em Unit ko, ye ki wow pyntip bait cha ka CEC.
Da khana u wa ka seiñ em ko kamwa 12-13 tylli ki Unit ha ki Constituency ha Khasi Hills, katwa ha Jaiñtia Hills da pyntip u wa hadien waroh chi kattu ym em Unit de ki, tangwa hapoh 6 bnai da yoh ki wow pynthymme biang kamwa 5-6 tylli ki Unit hapoh i pait yong u Wanshwa Nongtdu.
U Pangñiang heijooh i por da ong u wa ka seiñ ym em ko i thmu wow pynyieñ kyrtong ha waroh 29 tylli ki Constituency yong ka KHADC wa JHADC khlem da bichaar bniah ya ki kyrtong, deiwa pynsñiaw wa ki kyrtong kiwa mut wow yakhun na ka HSPDP toh u tip janai ki ya ki yurim wa ka seiñ yieñ ko neibynta ka ri wa ka jaitbru.
Hawa kylli hajrong ka Regional Democratic Alliance (RDA), uwa yahkhmat ka HSPDP da ong u wa i ya pynbait em ko wa ka UDP, tangwa ym pu ye wow ong won ha ki bynta wa kammon u ya krehlang neibhah daw hap yachem wa kiwa yahkhmat ka UDP.
Discussion about this post