Ka Jaiñtia Coal Miners & Dealers Association (JCMDA) daw pynman ko ya ka yalang paidbah ha ka 7 tarik uni u bnai April heipor 10:00 waje i step ha madan Teilang Playground Dkhiah West wei hadien won daw pynbood sa ka lai paidbah (Rally) cha ka Office u DC ka East Jaiñtia Hills District.
Kani ka Rally toh kam ka dak wow pynyoo yei pyrchah hajrong i khang khyrdep yei khayi mooyong wei tih mooyong nadooh u snem 2014 iwa da ktah bha ya ki manyung mansem wa em ha kylleiñ ka thaaiñ wei kani ka Rally toh yow pynbor ya ka sorkar wow booh ki kyndon namo wow Regulate yei tih mooyong kam i por wa nachwa ryngkat i stat ka juk kawa katni deiwa yada leh ya ka rymaw wei deiwa yoh myntoi ki tre paar mooyong wei kamjooh i chngaaiñ kiwa kreh.
Da ong leh wa ka Mining Plan toh u man ko katkam i long i man i thaw wei katkam i em u mooyong wei toh u yahaap ko leh katkam wa man ka thaw cheini ymtoh kam cha ri thor neibhah cha i u mooyong em u du kamwa 2-3 ft wei em u leh chapoh bha kamwa 300 ft tam wei i leh ya ka Open Cast Mining toh ka wym yahaap wei kawa wym man u pynkrehkaam ya kiwa boon.
Wei em leh du uwi ar ngut wa ye wei kiwa em yei thaw wa heh kiwa ye wow pynkrehkaam ya ka Open Cast Mining katkam wa da pynchlur ka sorkar wei kawa ye u leh toh deiwa tih chapoh khyndaw (Underground Mining) da kawa man Scientific kawa e myntoi ya waroh.
Kamtæ neiliang ka Association dei mynsien wa sñiawkhian da khut da wer ko ya waroh kiwa chong chnong ka Jaiñtia Hills kiwa sñiawthooh wa i khang mooyong da ktah ko yei yoh i kot yong ki yung ki sem kiwa yoh myntoi na u mooyong ha kiwa boon ki rukom wow sñiawbha phi u ya wan ryntih cha kani ka yalang paidbah ha katai ka sngi.
Da khut da wer ya waroh nadooh:
1. Kiwa chong chnong waroh wa kynthup ya ki chynrang wa kynthai.
2. Ki tre thaw wa kiwa kreh wei khayi mooyong.
3. Kiwa mylla sngi
4. Kiwa thap dai
5. Kiwa jied Mooslate
6. Kiwa yah kari
7. Kiwa dai dukan ja
8. Kiwa dai dukan yaaw
9. Wa waroh kiwa chong chnong ka bri u Ynñiawtrep kiwa chaniah wei kiwa psa ya ka kamai kajih ka yong ki lyngba u mooyong.
I pyntip na u Secretary ka Association, u Samanbha Supoh.
Discussion about this post