Ka seiñ kiwa khayi kawa tip kam ka Jaiñtia Tribal Traders Association (JTTA) da wan yachem ko wa u EM In-charge Trading License ha JHADC, u W. Sungoh ynne ka sngi hei wow pynkynmoo ya ka Council wa ka seiñ neipor cheipor jooh kyntu ko ya ka Council wow sangeh i e Trading License ya kiwa khayi na baar jylla (Non-Tribal) lane ki Company ki bar jylla hapoh ka Ri-loom Jaiñtia khamtam hapoh ka chnong Jowai.
Neiliang yong u EM da khana u wa ya ini i kaam ym ye u leh du na ka Council, tangwa iwa kongsan tam toh na ki Dorbar Chnong, chooh chooh da khana u wa da jooh khut ya kiwa yahkhmat ka Synjuk ki Waheh Chnong ka sor Jowai heiyatoh wow ya phyllu yumut ya kani ka kaam.
Neiliang ka JTTA da dap ko dei sñiawngooh iwa khroo ya u W. Sungoh wada chimkhia sakhiat u ya kani ka kaam, wei da kular u wow wanrah ya kani ka phang hapoh ka Executive Committee, da ban joor u leh ha ka seiñ wa iwa kongsan tam toh i kitkhlieh wa i chimkhia yong ki Dorbar Chnong.
Ka seiñ da booh ko yei kyntu ya ki seiñbhalang waphær waphær hapoh Ri Jaiñtia wow sniawkhia ki ya ini khamtam ya ka Synjuk ki Waheh Chnong kiwa em hapoh sor (Urban) kamjooh leh kiwa em ha palatsor (Rural) deiwa pyrkhat khia ya kani ka kaam, khnang wa ka pateiñ yow im yow neh u sah ko.
Ka seiñ kwah ko u khana wa chisien ka sngi ka seiñ da dep ki u yachem wow ya phyllu yumut wa kawi naki Dorbar Chnong hapoh ka chnong Jowai, katæ toh ka Ladthadlaboh Dorbar Chnong heiwa da pynsñiaw ki yei eh yong ki kiwa khayi wa khian wa tlot bor lada wan ki Company bar jylla wow seiñ khih seiñ kreh hapoh Ri-loom Jaiñtia lane hapoh sor Jowai.
Ka seiñ da yooluti wei ngait skem ko wa u yoh ya i krehlang liang wa nang khamtam na ki Dorbar Chnong.
