Ka Khasi Hills Autonomous District Council (KHADC) da kyntu ko ya ki paidbah ha khappood wow ya mih ki ha ka sngi wa ki Regional Committee lai ki wow pait wow sylli ya ki thaw wow ya pynbait ya u pood u ang hapyrdi ka jylla Meghalaya wa Assam.
Ka Boundary Committee yong ka KHADC da khut ko ynnin ka sngi ya ki khlieh synchaar wa kiwa yahkhmat chnong ha ki thaaiñ khappood kiwa em hapyrdi i ya kajia pood wa ka jylla Assam wow yatai hajrong ki kaam pynbait pood yong ka wat wa ar.
U Chairman yong ka Boundary Committee, u Pynshngain N Syiem uwa man leh u Deputy CEM ka KHADC da khana u wa ka yalang toh wa kiwa synchaar yong ki 5 tylli ki thaaiñ wa kynthup ya ka Desh Domreah kawa haap hapoh ka Hima Mylliem, ka Borduar kawa haap ha ka Hima Nongspung wa Hima Nongkhlaw, ka Nongwah Mawtamur kawa haap ha Hima Sohiong wa Hima Jirang, ka Langpih kawa haap ha ka Hima Nongmynsaw wa ka Block-II kawa haap haka Raid Nongtung yong ka Hima Khyrim.
Da ong wa ki paidbah kiwa chong ha kini ki thaw toh u ya mih paidbah ki hawa poi wan pait wan jngieh ki Regional Committee yong ka Meghalaya wa Assam wei wow pynsñiaw yei sur wa i kwah yong ki paidbah wow em bait hapoh ka jylla Meghalaya.
U PN Syiem da ong u wa ki kot ki sla kiwa ka Council da yoh pdiang da kdaw che wa nadooh ki snem 1900 da chem wa kiwa boon ki thaw kiwa haap hapoh ka jylla Meghalaya wei ini daw yarap ko chiboon yow pynsakhiat yei em u pood u ang wa ki parom wa hiar pateiñ namo ka History.
Hawa yatoh wa ki thaaiñ wa yakhleh ki jaitbru kawa ye u mih da kawi won ka sur, u Chairman yong ka Boundary Committee da ong u wa ya ini i bynta da pynkhamkti ha kiwa mihkhmat wa ki khlieh synchaar wa ya kiwi leh yow neh bait hapoh ka jylla Meghalaya wei da pynsñiaw ki wa kamwa man katni duna bha ki chnong kiwa kwah wow haap hapoh ka jylla Assam.
Discussion about this post