Ka Khooid Ya Ka Wah Myntdu kam chibynta i pteiñ i yong ka yow thooh laad chooh chooh yow chngaaiñ i im, dei wow biang chirup wa ka Syiem Myntdu nadooh yow yoh i ya ka um kawa khooid, ka la’er wa pynngaad, u skem ka khyndaw, u biang ka bordiñ, u yoh ki warep kba ha ki pynthor ki hali. Daw pynman ko ya ka yalang ha ka 09-11-24 heipor 1:00 waje i sngi ha yungwalieh ka Chilliangraij Jowai.
Ha kani ka yalang, u W.R. Kharkhrang u bru uwa da chem luti bha heiyatoh wa kammon u pynbha ya ka soodong sookun ka bei rymaw, khamtam heiyatoh wa ka jri ka plastic, i jhep wa kiwi kiwi kiwa pynsma pyntung ya ka chnong ka dong, uwa man u Senior Environmental Engineer ka Meghalaya State Pollution Control Board, Shillong daw wan klam u ha kani yalang wa sa ki Advocate kiwa daw batai ya ka Solid Waste Management na ka DLSA ka West Jaiñtia District.
Daw yoh leh yei yaklam na ki waheh chnong, kiwa krehkaam chnong yong ki dorbar chnong ha kani ka yalang yow pynbha, pynneh, pynmiat ya ka Myntdu.
Kamtæ ka Khooid Ya Ka Wah Myntdu chirup wa ki waheh wa sian, ki khynroo khyllood ka chnong ki dong kiwa sñiawkhia ya i chah lehbeiñ i hok u im i manbru longbru yong i chirup wa ka Syiem Myntdu, kyrpaad joor ko ya waroh ki waheh chnong, ki General Secretary, kiwa krehkaam chnong, ki khynroo khyllood kiwa thrang u im dei bha, i dap i biang nadooh na ka chnong ka Tuber Kmaichnong, ki san chnong hadooh ha ki waheh chnong ki chnong ka War Jaiñtia tawiar ka Syiem Myntdu, yow sñiawbha u wan ya chimbynta, yow yaklam ha katai ka yalang kawa kongsan bha, kawa daw him lang i ya ka rai wa kammon kwah i u man ka mynried ka pateiñ kawa katni wa kawa daw heh tawiar ka Myntdu.
Ha kani ka yalang ka Khooid Ya Ka Wah Myntdu u ya krehlang ko wa ka District Legal Service Authority, ka West Jaiñtia District.
Discussion about this post