Hadien wa yoh ujor na ki paidbah kiwa chah thok kiwa chah pynbiej ha kiwa kular wow yoh nong chiboon deiwa thap poisa du kajiak donhi lyngba ki Company, ki Online Gaming, Online Trading kiwa chim kabu ya ki bru, kamtæ neiliang ka KSU EJHDU hei yakhkmat u Pynshai Kupar Dkhar, Asst. General Secretary, u Shaniahskhem Dkhar, Finance Secretary wa u Shwari Ryngkhlem da lai yachem ki ya u Branch Manager ka State Bank of India (SBI) Ladrymbai Branch wow kyrpaad yei ya krehlang waka seiñ wow pynman yei pynsñiawthooh paidbah hajrong kini ki kaam chah thok.
Ka seiñ da ong ko wa ki paidbah ka East Jaiñtia Hills District kiwa kynthup nadooh ki khynnah skur, kiwa lai College hadooh ki manbei toh kiwa da maad yeini i chah thok.
Kamtæ da ong wa deiwa pynman ya ki pynsñiawthooh paidbah daw ye ki paidbah u tip kammon wow yait na ki Company wa wan pynbiej, ka khayi Online lyngba ki Apps kamjooh wow lait na ki bru wa wan kular wow yoh noh da ki phaw chah deiwa pynlut kajiak donhi.
Neiliang u Branch Manager da pdiang sñiawbha u yeini wa da tyrwa ka seiñ deiwa ong wa daw ya ksohkti lang yow hikai ya ki paidbah yow lait na ki bru wa thok wa chukor wow baam tooh ya ka poisa wa da kreh chitom ki bru.
Ka KSU da kyntu ko leh kamjooh ya ki paidbah wow man kiwa syndong bha lada em kiwa wan wow phon u thap poisa deiwa kamai suk.
Discussion about this post