Ka Khasi Students’ Union (KSU) East Jaiñtia Hills District Unit da khut pynman ko da ka yalang paidbah ha ka 5 tarik uni u bnai December heipor 11:30 i step ha VIKA Guest House Conference Hall yow pynsñiaw wei wow yoh yei pynche na ka Meghalaya Power Distribution Corporation Ltd (MePDCL), East Jaiñtia Hills District yei rukom su bai bordiñ.
Neiliang ka seiñ da pynsñiaw ko yei sñiawkhia yei ood ki paidbah neidaw wa da thurmur palat i rukom su bai bordiñ wa i ku bai bordiñ iwa da pynkulmar ya ki paidbah hadooh wym sñiawthooh de ki yeini wa jia iwa da pynman ya ka seiñ wow pynman ya kani ka yalang.
Ki seiñ da pyntip ko leh wa kiwa kreh ka MePDCL daw wan ki wow pynche wei nyngkong ya kani ka yalang da mut wow pynman ha Khliehriat West Community Hall kamwa dadep pynbna, tangwa na ki daw wym ye u kiar da hap wow rah pynman noh ha Conference Hall ka VIKA Guest House, Khliehriat.
Kamtæ da khut ya ki waheh chnong wa ki paidbah waroh kitu kiwa chah ktah hei rukom wym biang i su bai bordiñ wow wan cha katai ka yalang yow yoh ki yei pynche.
Discussion about this post