Ka seiñ kiwa kreh kam ki Muster Roll wa tip kam ka All Jaiñtia Muster Roll Workers & Labour Union-Jowai Unit daw lai li pynsñiawthooh ko cha kylleiñ ki chnong ha Ri Jaiñtia, ya iwa toh u yoh wa i hok na ka sorkar, yow lait na ka baamsap, ka baam poisa, ka ya ryntih yong kiwa kreh Muster Roll ha ki chnat ka sorkar Meghalaya, kiwa chna yung khyndaw bilat (Mistri), kiwa tih moo, kiwa tyndang mooria, kiwa chet ja sngi ha ki skur (PM-POSHAN/MDM) ki warep, wa ya kiwi tawon kiwa kreh mylla ha ka sorkar wa kiwa kreh nongsngi yong samen.
Ka seiñ bei chirup wa i yakrehlang wa ka chnat Nartiang, daw sdang ko u pynman da ka dorbar paidbah nadooh ka 23 tarik u Naiynñiaw 2022 heipor 10:00 waje i step ha yung dorbar chnong Nartiang. Ha kawa kiwa kreh mylla kiwa chong chnong ha Nartiang hadooh ha Khanduli wa ki chnong wa yabi wa ki daw wan ki cha katai ka dorbar.
Ka All Jaiñtia Muster Roll Workers & Labour Union-chnat Jowai, kam chibynta yow myntoi kiwa kreh mylla kiwa chong chnong ha Jowai na katai ka dorbar, daw pynman ko ya katai ka dorbar paidbah sa heipor 02:00 waje chariñ ka jooh ka sngi ha yung walieh (thymme) ka chnong Dulong, Jowai.
Kamtæ ka seiñ kyrpaad joor ko ya waroh kiwa kreh Muster Roll ha ki chnat sorkar jylla (PWD/PHE/SOIL/Forest/Agri & Horti/Water Resources/Sericulture wa kiwi), ya kiwa kreh chna yung khyndaw bilat (Mistri), kiwa chet ja sngi ha ki skur (PM POSHAN/MDM), kiwa kreh ASHA, ki warep, kiwa kreh nongsngi ha yung wa kiwi kiwi kiwa kreh mylla, ki khynroo ki khyllood kiwa em mynsien yow kyntu kynrong ya ka manbru longbru kiwa chong wa sah ha Jowai donhi, wa hamdam u wan ya chimbynta ha katai ka dorbar, khnang wa i thrang yow manbha manmiat i yong kiwa kreh mylla nongsngi, yow tip noh i ya i myntoi iwa toh hok u yoh na ki Scheme ka sorkar India wa na ka sorkar Meghalaya, i jooh leh yow sñiawthooh i ya i bor i kitkhlieh i yong i ha ka yung ka sem, kam kiwa chong chnong yow tip i ya ka kaamram i bynta i yong i, kammon u kyntu kynrong lang yow lait na ka baamsap ka baampoisa yow im yow chngaaiñ ka manbru ka longbru, u phooh u phieñ ka ri hi waroh kawi.
“Paan i ya iwa toh u yoh, u dawa i ya i hok,” pynkut ka khubor na u Hunbeitki Dkhar, General Secretary.
