Ka seiñ ‘Khooid Ya Ka Wah Myntdu’, hapoh i yalam u Chairman u Khroo L Pariat, u Army Lipon-Vice Chairman, u D.N. Suchiang-General Secretary wa u K. Lhuid-Assistant General Secretary chirup wa ki dkhot ka Executive Committee ka seiñ, daw lai pait lai sylli ki ya ka wah Myntdu ha ka 30 tarik uni u bnai nadooh i por 09:30 i step, yow tip yow sñiawthooh ya i kaam hachwa u pynkrehkaam yow pynbha pynmiat ya ka wah Myntdu, kamtæ u sdang u lai pait u sylli nadooh na ka khar wa kai ka Myntdu ha Jowai Bypass Mihmyntdu chadooh cha wa kai ko cha Pynthorneiñ Jowai.
Katda kamtæ, yow tip chooh chooh i ya ka wah Myntdu, khut lang i ya phi waroh ki Waheh Chnong, ki khynroo khyllood, ki waheh wasian kiwa chong talawiar ka wah Myntdu yow ya chimbynta lang wa i ha katai ka tarik hei por wa da booh.
Ka seiñ Khooid Ya Ka Wah Myntdu dap ko dei sñiawngooh ya ki khynroo ki khyllood ka Myntdu Cleaning Drive, ka Khimusniang Dorbar Chnong, ka Tympang Iawmusiang Dorbar Chnong, ka Panaliar Dorbar Chnong Jowai, ka JF&EPA ka seiñ wa pynneh ya ki doh-um ha ki wah ki thwai, ka Khliehtyrchi Dorbar Chnong wa kiwi kiwi ki kynhun, ki bru samen kiwa da yaleh chitom man-i-por u pynkhooid u pynrkhiñ wa ym hoi u noh jhep, u noh klong kiad, klong um, leh pynsih hapoh chnong wa khamtam cha ki bynta ka wah Myntdu ha ki bnai wa da dep katwa dang em ka chnong ka thaw ha i yaleh pyrchah ya ka khlam COVID-19 wa ha kini ki sngi wa da wai ka sorkar ya ki yaw ki haat dang yaleh chitom ki u pynkynmoo ya i kiwa chong chnong.
Kani ka nongmuna kawa da pynyoo wa da yaleh da kini ki kynhun, ki dorbar chnong, ki bru samen, jar u pood u yong ki, chynna hi wa da sdang kiwa chong chnong u sñiawthooh wa toh ka kamram ka yong i hi wa toh u leh khooid ym toh du i dhari i p’chem tangwa hadooh ki luti, ki surok, ki khar ki liar khamtam ka wah Myntdu kawa du naka donhi kawa dang pusai um-dih, um-baam, ka bordiñ ya ki chnong kiwa im talawiar yong ka wa ka ri Jaiñtia yong i. Han hadooh kattæ wa da yoo da sakhi i ya ka nongmuna wa da pynyoo ki dei mon wa kyllooid wa yaleh kini ki waheh, ki chynrang wa kynthai, ki khynroo ki khyllood, khamtam ha u pood u ang ka chnong Jowai, ym toh da dawa bha ka kaam u yakrehlang i chirup? Chirup deilang du iwa yæ u lehbha.
Kamwa da chynna lang hi phi waroh ya i man i long ka wah Myntdu, ha ki bnai ki sngi wa da dep poor COVID-19 pynngad ka la-ær wa wan na ka, bih wei bang ka um yong ka, kamtæ ym toh da dawa bha ko ya waroh ki thlu yung ha talawiar i yong ka wah Myntdu wa cha lait cha jngai na ka, yow ya chim i samen samen yei kamram yow ya krehlang i chirup, yow dam noh phi u pynemkaam Plastic hawa rah tiar na yaw na dukan, u noh jhep, noh klong kat chawa yoh, u pynkai um deiwa pynman kjut ya ka um, ki dieñ wa kiwi kiwi kiwa ktah ya ka la-ær wow riñ mynsien waroh kiwa im.
Kamtæ, kyntu joor i ya phi waroh kiwa yalam ya ki paidbah, ki seiñ niam, wa ha kani ka kynti, yow sñiawbha phi u khyrngiat yongbru noh yow im, yow chngaaiñ ka manbru longbru, ki khon ki pyrsa kiwa daw heh neini wa ka Bei Rymaw wa ka Wah Myntdu. Kynmoo bha yeini, ym em dæ da kawi tawan kawa ye u e ya phi ya ka la-ær ka wow pynim ya i manbru longbru toh sa du na ka donhi wa dang yoh um-dih um-baam i kattæ hadooh u warep cha pynthor kba, cha kpær yoh um u na ka Bei Rymaw ka wah Myntdu.
Ka kyrwoh na u Kyllimot Lhuid, Asst. General Secretary.
