Ka Seiñraij Wahiajer khut sñiawbha ko ya phi waroh ki khon u Ñiaw Wasa wow wan sakhi ya ki lehniam Behdieñkhlam kiwa daw sdang ha kani ka 7 tarik ka sngi Pynsiñ heipor 12:00 waje pyrdi sngi heiwa waroh ki khon ka Raij u ya mih ki cha yung walieh yow lai thooh ya u Dieñkhlam. Hachwa u mih na yung walieh daw em i snieñ kyntu, i ngooh i dem manda poi hei thaw wa em u dieñ khlam wei chwa u rah ya u Dieñkhlam daw yoh i snieñ i kyntu wa i ngooh i dem. Manda poi u Dieñkhlam ha i thaw pynyieñ, daw yoh biang ya i snieñ i kyntu kamjooh ya i ngooh i dem da u Langdoh ka Seiñraij Wahiajer, u Wh. Firstborns Phawa.
Haka 8 tarik ka sngi Mulong waroh ki khon ka Seiñraij Wahiajer u pyndep ki u pynkhreh ya ki Rot wa ya ki kaam ha yung walieh.
Haka 9 tarik ka sngi Musiang, dang step u ya mih u ya wan ha yung walieh u e ngooh e dem chwa u laai chaad ha ki thlu yung yow choh thyndai iwa hap u sdang chaad na tre yong u Dieñkhlam yow poi won cha ki thlu yung yong ki khon ka Seiñraij.
Heipor 4:00 waje i janmiet daw em chooh i snieñ i khroo, i ngooh i dem hachwa u ya chaad na yung walieh chadooh cha laad Ummulong wei manda wan na laad Ummulong u chaad pyndep ha tre yong u Dieñkhlam.
Haka 10 tarik ka sngi Muchai, dang step u ya mih biang ki khon ka Seiñraij u lai chaad pyndep yei choh thyndai cha ki thlu yung yong ka Seiñraij, dep tæ u pynkut ya i chaad yung toh ha yung yong u Langdoh, hadein wa dep na yong u Langdoh u pynbiang pyntoh won ya ki Rot yow kit cha ka bei Seiñraij Ialong hadien won ini u tympat ya u Dieñkhlam wei u kyntiñ oo le sien, u pynchaad ki oo na i thaw wa pynyieñ hadooh ha laad yung walieh iwa man kam ka dak u khang u kah ya ka kjut ka chitom, ka khlam ka dait ya waroh ka chnong ka thaw ka Seiñraij Wahiajer waroh kawi.
Heipor 11:00 waje i sngi waroh ki khon ka Seiñraij Wahiajer u mih ki u lai pyndep yaka niam ka rukom chirup waki Rot cha ka bei Seiñraij Ialong
Ka khubor na u Pyntngenmiki Mulieh, President Seiñ Khynroo Khyllood Seiñraij Wahiajer.
Discussion about this post