Ka sorkar jylla da lai ko chaaid chaaid wow thung noh ya u/ka Chairperson wa thymme hapoh ka Meghalaya Lokayukta, hadien wa da chong-ngiah noh u Bhalang Dhar, IAS (retd.) kam u Chairperson ha ka 28 tarik u Thohlakhmi (Feb) ha uni u snem.
Ka Meghalaya Lokayukta ym em de krehkaam ko kattu da palat chi bnai hadien wa da kut noh ka samoi krehkaam u B. Dhar wei ym ye de ko wow pdiang ya ki ujor neibhah wa da krehkaam ko du dei pait u Chairperson khlem da em kiwi won ki dkhot.
Hawa kylli yei slem wow thung ya u/ka Chairperson wa thymme, neiliang u Commissioner & Secretary, u CVD Diengdoh (IAS) da pyntip u wa em ki kyndon kiwa hap wow bood ryntih bha wow thung ya u/ka Chairperson hapoh ka Meghalaya Lokayukta.
Katkam i pyntip uni u sahep sorkar wa da thung ya ka Search Committee wa khlieh da u Peter Dkhar, IAS (retd.) wei kani ka Committee da pynmih ko yei pynbna wow khut Application ha ka tayaaw wa dadep wei da pynbna ya ka tarik wa khaddooh wow phah ya ki Application ha ka 25 tarik uni u bnai.
Da khana leh wa ka Search Committee hadien wa yoh ya ki Application daw jied 3 ngut kiwa biang tam katkam ki kyrdan kiwa man katkam ka Meghalaya Lokayukta Act, wei hadien itæ daw phah yei pyrtuid cha ka Selection Committee wa khlieh da u Montri Rangbah ka jylla.
U Chairperson wa nyngkong hapoh ka Meghalaya Lokayukta toh u Justice (retd.) P K Mushahary uwa da chimkti nadooh u Khonchoglad (Nov) 2018 hadooh u Naisan 2021 wei da bood sa u Bhalang Dhar, IAS (retd.) uwa da chimkti nadooh u Thohlakhmi 2022 hadooh u Thohlakhmi 2025.
Discussion about this post