Jowai: Hadien ka yalang wa pynman haka 27 tarik u Khonchonglad (Nov) ha yung walieh ka dorbar chnong Tpep Pale wa da wan chimbynta da ki 17 ngut ki waheh chnong hei pynlai u President ka Synjuk Waheh Chnong Jowai u A. Ñiangti, da rai ki wow khut yalang yaki bru khroo pyrkhat ka chnong Jowai cha ka yalang wow man haka 12 tarik uni u bnai ha Indoor Hall ka Chutwakhu.
Ya ki khroo pyrkhat ki wow wan cha katai ka yalang daw jied da ki waheh chnong 2 ngut chi chnong yow yoh yei e yumut yong ki heiyatoh wa i lai luti ki waheh chnong Jowai hajrong i kyrriah yaka PWD North Division, heiwa kamwa 44 ngut ki bru khroo pyrkhat u em ki wa 22 ngut ki waheh chnong.
Da rai ki leh wow paan daka RTI na waroh ki Division wa kynthup ya ka North, South waka Central Division yong ka chnat PWD yow tip yaki sarok kiwa da dep rah na kawi ka Division cha kawi ka Division.
Neitæ yow tip leh yei rukom krehkaam ka PWD heiyatoh waki Contract, ki Bill, Saction Tender, ki Support Tender wa kiwi.
U paan RTI leh hajrong ka Mynngot Water Supply Project lyngba ka chnat PHE, Engineering Electrical Division, Jowai kamjooh leh hajrong ka Iawmusiang Complex naka JHADC wa naka PWD (Building).
Kamtæ u L.D. Lakiang Secretary ka Synjuk Waheh Chnong Jowai, kyrpaad u ya ki khroo pyrkhat ka chnong Jowai wow sñiawbha ki u wan mih cha katai ka yalang.
