U Chief Executive Member ka Karbi Anglong Autonomous District, Council (KAAC) u Tuliram Ronghang lyngba ki Social Media da kam u wa kiwa chong chnong ka Mukroh toh kiwa wan sah tooh (Illegal Settlers) ha West Karbi Anglong ka jylla Assam.
Hajrong ini hawa yaklam wa ki waheh ka chnong da ong ki wa da em u pood u ang wa da booh na ki nachwa ha i dur ki dieñ sapieñ wa ki dieñ sachram kamjooh leh ki liar ki chka wa ki moopynyieñ wow kdaw ya ki pood ka chnong.
Heijooh i por da ong ki wa neiliang yong ki da em ki ya ka Map wa da e da ka United Khasi Jaiñtia Autonomous District Council ha ka 25 Naichiphaw 1968 kawa da pynskem chooh ya u pood u ang ka chnong khamtam ya i khloo ka chnong iwa heh hadooh kamwa 56 Sq Km.
Heijooh i por neiliang ki waheh (kiwa palat 60 snem) ka chnong ka ong ki wa ini i klam u CEM ka KAAC toh iwa yah bakla waroh khamtam ha kani ka juk Social Media, wei kam ki waheh nood ki wow kdaw markhmat neiwon sdang u pood khloo wa u pood hali yong ka chnong Mukroh.
Kini ki jooh ki waheh ka chnong Mukroh da ong ki wa lada ka sorkar MDA hapoh i yahkhmat u Conrad Sangma naka NPP deiwa emlang ka UDP wa kiwi pyrkhat ki ya ka mynried mankawi kiwa chong chnong da toh u wan ki cha ka chnong wow tip yeiwa sakhiat. Da ong leh wa haka sngi wa u Conrad deilang wa kiwi ki Montri sorkar wan ki cha ka chnong, ym em lai pait ki ya u pood ka chnong.
Kamtæ kini ki waheh ka chnong Mukroh da khut sñiawbha ki leh ya u Montri Rangbah ka jylla, u Conrad K Sangma wa kiwi ki Montri ka sorkar jylla Meghalaya wow wan yooh kjat nadooh wa sdang u pood ka chnong khnang wow pynsakhiat noh ya u pood wei u yoh noh ki yei suk iwa chi rta.
