Ka Dorbar Chnong Moolamylliang, East Jaiñtia Hills District da khut sñiawbha ko ya waroh wow wan cha ka yalang wai paidbah ya ki pynriam khrik-khrak Christmas kawa da e pyrtuid kam ka ‘Christmas Lights Extravaganza’ kawa daw pynman ha ka 18-12-21 heipor 5:00 waje i janmiet heiwa u James Sangma, Montri ka chnat i chait i khiah ka jylla daw wan u kam u kongsan.
Ki khrik-khrak kiwa da pynkhreh toh ki wow pynchngaaiñ pynmiat dur ya ka chnong yow wanrah yei mynsien lehkmen Christmas.
Daw pynman leh ya ka Christmas Concert ha ka 23-12-21 heiwa daw wan pynwyrngia da ka “Revive Band” kawa na Jowai wa ka “Sweet String Band” kawa na chnong Rymbai.
Daw em leh ki dukan dai baam wa da pynkhreh da ka CTC Orchid Inn Thadlaskein, Jowai nadooh ka 18-12-21 hadooh ka 02-01-22.
Ym em khang ya ki bru wow wan riñ dur, chondur, u pynemkaam da ki Drone wei wow ya rwai.
Ka chnong Moolamylliang toh kawa jngai 112 Km na Shillong wa 15 Km na Khliehriat wei ka sarok man ko kawa miat tangwa ym em pynkhreh thaw wow sah miet.
Kamtæ da khut ya waroh wow wan sakhi ya ini.
