Ka Dorbar Chnong Namdong-B daw pynman ko ya ka E Yadaw Rong kawa jooh pynman man-u-snem tangwa da dooh wow pynman ya kani ka tamasa ha kini ki ar snem neidaw wa em ka khlam COVID-19.
Kamtæ ha uni u snem 2022 ka Dorbar Chnong daw pynman ko ya kani ka yadaw rong haka 30 tarik uni u Naisaphra kawa men leh ka sngi Musiang.
Kani ka yadaw rong toh kawa kawa da sdang nadooh ki por warim wajah wei da pynneh pynsah hadooh kini ki sngi.
Kani ka yadaw masi kawa khut ka E Yadaw Rong man ko ka riti dustur ki jaitbru Pnar kawa da pynman hachwa u pynlum pynlang ya u kba na ki hali ki hator.
Neiliang ka Dorbar Chnong Namdong-B lyngba u Waheh Chnong, u D.S. War da ong wa kam i dak u pynneh pynsah ya ka riti dustur da pynman biang ya kani ka E Yadaw Rong ha uni u snem, kamtæ da khut da wer ya ki lok ki jor kiwa najan na jngai u wan sakhi lang ya kani ka E Yadaw Rong ka chnong Namdong-B.
