Jowai: Ka Seinraij Mukhla da kani ka wyrta khut sñiawbha ko yaki paidbah ka bri u Ynñiawtrep trep cha ka Behdieñkhlam yong ka Raij kawa u man haka 23-08-2019, ha i por 2:00 waje chariñ sngi ha Biar (Aitnar) ha Mukhla Nongrim.
Yaka leh niam Behdieñkhlam u sdang ko nadooh ka 20-08-2019 (Pynsiñ) daka yachemlang ki waheh Sankur Sankmai waki paidbah hapoh i yahkhmat u Langdoh, neibynta u ya pynbait ya ki wow li dain yaki ar tylli ki Dieñkhlam.
Haka 21-08-2019 (Mulong), daw ya mih paidbah ha i por pyrdi sngi yow lirah yaki Dieñkhlam na khloo. Manda poi ki Dieñkhlam ha Tihkhyndaw wa ha Madan Slotmasi daw chong yalang biang neibynta u ya pynbait yaki kaam haka Musiang.
Hka 22-08-2019 (Musiang) ki dong ki chnat da pynkhreh ki jar jiar ki Bom ki Bhuri yow lai li chaad paidbah cha ki dong waphær waphær kiwa em hapoh ka Raij. Heipor jan miet daw pynieñ yaki Dieñkhlam wei pynbood wan saka yalang paidbah hapoh i yahkhmat u Langdoh.
Haka 23-08-2019 (Muchai), heipor 6 waje istep daw Tyngkhaiñ Khong ha Yung Blai (Yung Langdoh) pynbood saka chaad waka Choh Thyndai daki Dieñwaliar, u Langdoh waki waheh manda palat kiwa chaad u mih ki yow lai li knia yaka Syiem Khlam wa u Ram Shillong. Ha i por pyrdi sngi 01:00 waje daw pynpoi lut yaki Rong ha madan Slotmasi, katwa ha i por 2:00 waje daw pynhiar yaki Dieñkhlam waki Rong cha Biar.
Ka Behdieñkhlam yong ka Raij Mukhla toh kawa khaddooh man u snem, myntu u snem haka sngi pynkut daw wan sakhi leh da u Chief Minister ka Meghalaya, u Conrad K.Sangma chirup wa kiwi ki Minister MLA, MDC.
Ini toh katkam wa pyntip u T. Sumer, General Secretary Seinraij Mukhla.
Discussion about this post