Ka Airports Authority of India (AAI) da pynmih ko ya ka Tender Notice yow pynheh noh ya ka Shillong Airport wa em ha Umroi, Ri-Bhoi hadien i booddien ka sorkar Meghalaya neipor cheipor heiyatoh wa ini i kaam.
I chna pynheh kynthup i nadooh wow pynjrong da 571 Metre ya ka luti hiar ki lieñsuiñ yow poi waroh 2,400 Metre i jrong wei da ini daw ye u hiar ki lieñsuiñ heh kam ka A-320.
Daw chna pynheh leh ya ka yung ka Airport (Terminal Building & Apron) deilang wa kiwi de wei katkam ka Tender Notice i kreh toh iwa chongdor Rs. 119.44 klur wei yei kreh u pyndep hapoh 18 bnai deiwa e por leh 3 bnai deiwa pyrkhat ya u slap.
Neiliang u Montri Rangbah ka jylla, u Conrad K Sangma da ong wa ini daw pynkylla dur ko ha kiwa boon ki liang wei daw pynku ko leh ya ki kaam uiñke suwari iwa daw yarap u pynyoh kreh ya ki khon khynroo khyllood yong i.
Ka AAI ha u Naisaphra 2024 da khana ko wa emkaam yei thaw wa 22 Acre yow pynheh ya kani ka Airport wei i pynyoh thaw toh iwa da lai chakhmat.
Ini waroh daw yarap ko leh wow khriñ ya ki bru wow wan cha ki tamasa wa boon wa pynman ha Meghalaya kam ka Shillong Cherry Blossom Festival, Me’gong Festival ha Tura, Winter Tales kiwa da sdang wow yoh yei tipmit hakhmat ka pyrthai.
Ka sorkar da pyntip ko wa dang yaleh ko yow sdang u pynkrehkaam noh ya ka Baljek Airport wa em ha Garo Hills deiwa pynheh ya ka luti hiar ki lieñsuiñ.
Discussion about this post