Khut yaklam ka sorkar ya ki seiñ saiñpyrthai, ki seiñbhalang, ki ADC chwa wow pynbait pood

Ka sorkar Meghalaya Democratic Alliance (MDA) hapoh i yahkhmat u Montri Rangbah, u Conrad Kongal Sangma ynne ka 15 tarik da lum u ya waroh kiwa yahkhmat nadooh ki seiñ saiñpyrthai, ki seiñbhalang wa ya ki ar tylli ki Autonomous District Council (KHADC wa JHADC) neibynta wow lai chakhmat wa i pynbait ya u pood u ang wa ka jylla Assam.

U Symbood Montri Rangbah ka jylla, u Prestone Tynsong da ong u wa ka sorkar da pdiang ko yei e yumut yong ki kynhun waphær waphær wei wow bichaar bniah hachwa wow em biang i yaklam yong ki ar Montri Rangbah, u Conrad Sangma wa u Himanta Biswa Sarma ha ki sngi wow wan. Da ong u wa ka sorkar daw lai ko chakhmat da i jooh i sur wow pynbait ya u pood u ang.

Da pyntip u wa i e yumut wa ka sorkar da yoh ko toh wow pynbait pood deiwa leh katkam ki kot ki sla, ki dulir wa ki khana pateiñ yong ka jylla, heiwa da ong u wa ini i e yumut, ka sorkar daw bichaar bniah bha din pa din hachwa wow yaklam biang wa ka sorkar Assam.

U Prestone da ong u wa i yasyllok da man bait chwa du neibynta ki 6 tylli ki thaw wa rap suk wow pynbait wa kiwa da tipmit toh kiwa em hapyrdi i ya kajia, tangwa neibynta 6 tylli kiwi won, ka sorkar daw khut biang ko yei yasyllok ha u snem wow wan.

Related posts

Pynbna ka VPP ya ki kyrtong MDC ha ka JHADC wa KHADC

November 13, 2024

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Hawa kylli hajrong i dawa wow pynyoo paidbah ya ka Report yong ki Regional Committee, u Prestone uwa man leh u Chairman ka Regional Committee yong ka Ri-Bhoi da ong u wa ya katni ym ye wow pynyoo paidbah ya ka Report neibhah wa toh kawa da ekti bait ha u Montri Rangbah, wei da ong wa emkaam wow yang chwa yei yachem ki ar Montri Rangbah wei hadien wa da chim rai ym em i eh wow pynsñiaw paidbah ya ka Report.  

Kam wow kdaw wa ki Montri Rangbah yong ka Assam wa Meghalaya da yachem ki wow yaklam neibynta wow pynbait noh ya u pood u ang wei da rai ki wow sdang chwa da i pynbait ya ki 6 tylli ki thaw wa rap suk na ki 12 tylli ki thaw wa ya kajia, kitæ ha ki bynta wa nyngkong da rai wow pynbait chwa ya ka Tarabari, Gizang Reserve Forest, Hahim, Boklapara, Pilangkata Khanapara wa ka Ratacherra, katwa ha ka kylla kawa ar i pynbait pood daw man ya ki thaw wa rap jwat ka ya kajai, kiwa kynthup ya ka Langpih, Bordwar, Nongwah Mawtamur, Deshdemoria, Khanduli, Umkhyrni Psiar, Block I wa Block II.