Shillong: Ka sorkar jylla lyngba ka Meghalaya State Planning Board (MSPB) ynne ka sngi, da khut yalang ko ya ki Dorbar Chnong kiwa em ha sor wa khapsor wei kamjooh leh ki Balang, ki Seng Samla na ka thaaiñ Madanrting wa ki pulit ka Shillong wow phyllu yumut kammon wow thooh ki laad ki luti wow yakhun pyrchah yei wan hiar thma i drugs ya ka imlang sahlang wa ki khon khynroo ka jylla.
Hawa yaklam wa kiwa pathai khubor, u Chairman ka Meghalaya State Planning Board, u Lambor Malngiang da ong u wa da sñiaw toh wow e mynsien ya ki chnat pulit neibhah du hapoh chiphaw sngi ha uni u bnai, ka chnat da yoh ko wow khyrrup hadooh palat klur i drug na ka nongbah.
Ha kani ka yalang da chim ya ka rai, wa ki tre yung haap bichaar bniah ki ya kiwa wan chong wai, neiwon wan ki, lada em pyrtuid ki ha ki pulit wa kiwi kiwi khnang wow pyntikna wa ki damok ym yoh thaw ki.
U Lambor da ong u leh wa ki tre yung emkaam wow chim ki ya ki kot ki sla kiwa chong wai wei wow e ya ki cha ki pulit kamjooh leh cha ka dorbar chnong.
Kawi won ka rai wa da yaklam toh hajrong ka Drug Policy wow khoom u kdoh ya i roi i drugs wei ka sorkar jylla lyngba ka Social Welfare da pynkhreh ko yeini wot hadooh wow pynkylla wamut ya kiwa ngat ha i dih drugs namo ka Rehabilitation Centre.
Chooh chooh da pyntip u wa daw pynman yei pynche paidbah ha kylleiñ ki chnong ka nongbah wow pynsñiaw yei ma wa mih na i drugs deiwa pynrap wa daw lai thooh bniah u na jylla Mizoram kammon ye ko wow yakhun pyrchah ya u drug.
Discussion about this post