Jowai : Ka Jowai Municipal Board ynne ka sngi da khut yalang ko ya waroh 24 ngut ki waheh chnong ka sor Jowai ha yungkrehkaam ka Municipal yow yaklam hajrong ka National Population Register næ ka (NPR) waka Aadhar.
Ya kani ka yalang da phah da u Deputy Commissioner ka West Jaiñtia Hills u Arunkumar Kembhavi heiwa u Chief Executive Officer JMB u ma S.C. Laloo da ong u ha kani ka yalang da pyntip malu male yaka aiñ chaphang ka NPR kawa wan na ka sorkar India, kawa ong wa waroh kiwa chong chnong ka Ri India haap thap pyrtuid ki hapoh ka NPR.
Neiliang ki waheh chnong da rai ki wow khut da ki bru chemphang wow batai yaka NRP wa ka Aadhar, khnang wow ye ki u batai che cha ki paidbah.
Ki waheh chnong da paan ki na u CEO ya kani ka aiñ yow bichaar bniah ki chwa wow ye ki u lai chakhmat heiyatoh wa ini i kaam wei da paan ki leh i por kamwa 30 sngi chwa wow chim ki yaka rai wa khaddooh.
Neiliang ki seiñbhalang kiwa kynthup yaka JSU waka AJYWO da pynsñiaw ko leh yei pyrchah joor yong ki yei thmu ka sorkar wow pynkrehkaam yabor yaka NPR iwa man pyrchah yaka rai wada chim haka yalang wada pynman ha ki bnai wada dep waka sorkar heiyatoh weini.
Heijooh i por ki seiñ da dawa ki leh wa emkaam u lai ka sorkar cha waroh ki chnong ki thaw yow pynsñiawthooh ya kani ka aiñ chwa wow pynkrehkaam yaka.
Discussion about this post