Khynra Trading License ka HYC chem leh ya ki nong Bangla wa dai dakha

Jowai: Ka seiñ Hynñiewtrep Youth Council (HYC), War Jaintia Circle wa ka Jowai Circle da hiar ki cha ki thaiñ khappood yow pynman ya ka khynra Trading wa Labour License na ki baar jylla wa dai dukan ha ka chnong Dawki wa Bakur, ynne ka sngi, ha i yahkhmat u General Secretary HYC-JC u Roaming Lamare, President HYC-WJC u Yoohunki Shylla, Organizing Secretary u Meshwa Khongiong, wa ki dkhot yong ka seiñ.

Ha kani ka lai khynra, ka seiñ deilang wa ki waheh chnong da chem ki wa ki dukan baar jylla toh kiwa ym em yaka Trading License wa Labour License, ka seiñ da khang tala syndon ko ya ki, da em won kiwi ki wym pynthymme wei em won kiwi kiwa da pynthymme, katwa ki baar jylla kiwa em ha dukan kiwa boon hi ki wym em ya ka Labour License, tangwa da ong ki wa em ha ki malik næ tre dukan yong ki kiwa man leh ki baar jylla, wei ya kini ka seiñ da phah ko wow wanrah ya ki kot ki sla yow pynsakhiat.

Katwa kawa phylla won wa ka seiñ da chem ko ya ki nong Bangladesh kiwa wan chnong dai dakha hapoh ka yaw Dawki, kiwa ym em kiwon kiwon ki kot ki sla wa yoh ki u psiah chapoh ri India, ka seiñ da beh noh ko chisyndon ya kini ki nong Bangladesh wei daw takit bniah na kiwa pynlai yong ka yaw Dawki kamjooh na kiwa pynlai chnong wa ki pulit kammon wa kini ki bru na Bangladesh yoh ki wow psiah wow kamai hapoh ka jylla.

Hawa kylli, neiliang ki para wa chnong dai dakha da ong ki wa nachwa kini ki bru na Bangladesh ki wan ki wow dai lang (Whole Sale) ya ki dakha ha kani ka yaw tangwa katni won da chong dai lang ki deiwa dai khutia ha kani ka yaw.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Neiliang u Y. Shylla da ong u wa ka District Council ka em ko yaka aiñ Trading License by Non-Tribal Regulation Act, tangwa da yoo ym em yada ko yaka jaitbru, wei kani ka aiñ da man ko du kam ka kaam khayi wa ka chna poisa ki MDC ka Council, neibhah da yoo dei khmat wa i e Trading License pathar ya ki baar jylla da joor bha ko katwa dang lai ki por.

U R. Lamare won da ong u wa ym chnong klikti wei u boodien ya kani ka kaam yow chem yei sakhiat wa kammon kini ki nong Bangladesh khlem kiwon kiwon ki kot ki sla wa biang poi ki chapoh ka jylla wei da kyntu leh ya ki bor ka District Council wa ym toh u e Trading License kulmar ya kiwon kiwon khamtam cha ki thaw wa em cha khappood.