Ka Meghalaya High Court ynnin ka sngi da pynsñiaw ko yei khyrngiat hawa puræ yei jubab ka yung krehkaam u Deputy Commissioner, West Khasi Hills heiyatoh wa ka mukotduma pyrchah ya ki karkhana Coke wa krehkaam pyrchah ya ka aiñ khlem da yoh bor hapoh ka District.
Katkam ka jubab u DC lyngba ka Affidavit, da ong wa hadien wa pynmih hukum ka yung bichaar da lai kynreh wei da khang syndon ya kini ki karkhana Coke kiwa krehkaam pyrchah ya ka aiñ wei da chem wa boon toh kiwa krehkaam dei miet ha ki thaw wa em cha jngai.
Da pyntip leh wa hadien wa khang, da kem leh ya u mooyong kamjooh u Coke wa da dep pynmih wei waroh ki karkhana da em ki 57 tylli kiwa da khang wei da phah kot yow khang wei da e FIR leh ha ka Shallang Police Station.
Kamtæ ka High Court da ong ko wa ym ye u pdiang wa em 57 tylli ki karkhana Coke namo ki Coke Plant kiwa krehkaam dei rieh dei tooh khlem da tip ki bor ka aiñ wei toh i kamram ka sorkar jylla wow khang ya kiwon kiwon ki karkhana kiwa krehkaam khlem ka License deiwa pynsñiaw yei wym hun yei krehkaam ka sorkar heiyatoh wa i tih mooyong pyrchah aiñ wa i krehkaam ki Coke Plant.
Da ong leh wa da yoo sarom hanla ka Supreme Court da dep pynmih hukum ko tangwa da wanrah pathan yei wym krehkaam ki aiñ pyn da ka sorkar hi iwa da yoo lakam wa yarap wow tih mooyong pyrchah aiñ wei wow krehkaam ki Coke Plant khlem License iwa da pynchlur kylla wow tih mooyong pyrchah ya ka aiñ.
Ka High Court da pyntip ko wa ynnin ka 1 tarik da em sa kawi ka mukotduma heiyatoh wa i tih mooyong pyrchah aiñ ha South Garo Hills, kamtæ da phah ya u Chief Secretary wow e u ya ka bui (Report) mynstep ka 3 tarik wa iyi wa da leh wow pynchitom ya ki sahep sorkar kamjooh kiwon kiwa da chah beh kreh (Suspension), ka takit ya ini ki sahep sorkar wei kammon da leh ya ki tiar ki tar wa da kem na kini ki Coke Plant.
Da phah leh ya u Chief Secretary wow wanrah u da oo ya kani ka Report wei u kitkhlieh ya iwon iwon i tih mooyong pyrchah ya ka aiñ lane i em ki karkhana Coke kiwa dang krehkaam pyrchah ya ka aiñ hapoh ka jylla.
