Ka mukotduma wa da leh hi da ka High Court ka Meghalaya wa da chong bichaar noh da ki le ngut ki Judge (Full Bench) wa kynthup ya u Justice Sanjib Banerjee, Chief Justice, u Justice H.S. Thangkhiew wa u Justice W. Diengdoh hajrong i roi i kaam tih mooyong pyrchah ya ka aiñ hapoh ka jylla hanla da khang ka NGT kamjooh ka Supreme Court ka ri. Hajrong ini, ki le ngut ki Judge ka High Court da lai ki wow sakhi dei khmat yong ki hi deiwa synraan ka Chief Secretary ka jylla heiwa da lai hiar ki cha ka thaaiñ Khliehriat.
Ha ini i lai da chem ha tymbud luti ya u mooyong wa dang dep tih wa da booh ha waroh arliang u sarok da ki phaw Kilometer wei da man u uwa thymme neidaw wa dang tyrchiah bha u, da ong ka yung bichaar.
Hawa lai na Khliehriat cha Amlarem da chem leh yei thaw wa chynna u pait chapoh heiwa da yoo cha tre u riat wa em ki dak ki chin nadooh ki tiar ki tar wa da pynemkaam yow tih mooyong nadooh ki thaw sah najrong wa em leh phlet u mooyong wa da noh pyn harood sarok, da pyntip chooh chooh ka yung bichaar.
Ka yung bichaar da ong ko hawa sdang ya kani ka mukotduma da leh neidaw wa mih khubor wa em i tih mooyong pyrchah ya ka aiñ ha ki thaw wa em cha kdong cha chmiang, cha ki thaw wym em wa sah bru wei chitom wow poi thaw. Tangwa deiwa yoo yeini i tih mooyong pyrchah aiñ ha ka thaaiñ Khliehriat, da chynna wa ini i kaam toh iwa joor wei ye i wow joor chooh chooh cha ki thaw wym ye u yoo.
Da pyntip leh wa katkam ka bui (Report) wa da e da ka Chief Secretary kamjooh ka Director General of Police da ong wa da leh wow pynchitom ya kiwa emkti. Tangwa da yoo won wa ym em bood ya ki kyndon wa da booh da ka Supreme Court. Wei i kaamram toh i yong ka Chief Secretary ka jylla wow pynkrehkaam ya ki kyndon yow khang ya ki tih mooyong pyrchah ya ka aiñ khlem da pynslem.
Ka yung bichaar da ong ko wa da yoo phylla wa ka sorkar ym em pynemkaam ko ya ki Drone yow pait ya ki thaw wa chitom u lai, u poi. Wei da khyrngiat leh wow yoo wa ki District Magistrate, ki Sub-Divisional Officer kamjooh ki sahep ki Block hadooh ki pulit wa kynthup ya u Superintendent of Police da leh thlah ki hawa yatoh wa ini i kaam.
Kamtæ da ong wa kamwa da yoo yei boon ki thaw tih mooyong pyrchah ya ka aiñ ha thaaiñ Khliehriat , wei ym ye wow leh lada ym em wa pait, ym em pynchitom ki bor District lane wa em i ya krehkaam lang.
Hajrong ini da ong wa hap wow bood yaka hukum ka Supreme Court kamjooh ki yong ka Committee wa da thung da ka NGT kiwa boon leh toh kiwa da mynjur da ka Supreme Court. Kamtæ ka Chief Secretary da phah ya ka wow bood ko ya kini ki kyndon wei manda bichaar biang ya ini i kaam hadien soo tayaw hap ko wow pynyoo iyi wa da leh ko.
Heiyatoh wow chalan ya u mooyong wa da dep tih deiwa dai lilam lyngba ka Coal India Limited da yoo lakam ka sorkar ym em chimkhia ko wow leh yeiwa da phah ka Supreme Court waka NGT iwa da pynman yeiwa man katni iwa ym ye wow pdiang. Wei ye wow hap u thung biang ya ka Committee yow pait yeini kawa ye u krehkaam laitlooid khlem da pynthut da kiwon kiwon kiwa em hei bor.
Ya kani ka kaam daw chong bichaar biang ha ka 04-04-22.
