Khyrngiat u Rikut wa ka dorbar ka JHADC toh kawa leh tangdep donhi | Yoh jubab chisien deiwi chisien deiwi

U MDC ka Saphai Sahsniang, u Rikut Parieñ ynne da dap u dei sñiawsih wa ka Dorbar Tlang ka JHADC man ko kawa du chi sngi donhi heithaw wow man ko ar sngi wot hapyrdi wa da kyrpaad ya u Chairman neibhah ki kaam wow yaklam man ki kiwa boon khamtam wa em hadooh 5 tylli ki Motion wa wanrah ki MDC ka Liang Pyrchah.

Da ong u wa neiliang yong oo wot tang iwi leh ym yoh u wow kylli hapoh ka dorbar ynne hanlada pynkhreh u 6 tylli ki mat wow kylli, deiwa pynrap wa hawa rah ya ka mat wow kylli ymtoh wow pynchitom ya ka chnat ka Council næ wow thooh daw ya ki Executive Member ka Council tangwa kwah ki wow kynrong wow tip yeiwa duna weiwa emkaam hapoh yong ka.

U Rikut da phylla u wa iwa mut u wow kylli ynne yeiwa da yoh jubab u ha ka kot khlem yoh u kylli booddien hapoh ka dorbar toh katwon tylli ki thaw wa mantre ka JHADC heiwa da jubab ha ka kot wa em du 6 tylli ki thaw yeiwa da thoh ya ki pyrtuid yong ki.

“Cheiwon wiar ki thaw ka District Council neibhah dang boon bha kiwa wiar neini ha ka jubab wa da e ha ka kot, kam ka thaw ha Khliehtyrchi, Mihmyntdu, Salini Colony, Sabahmuswang, Saphai wa kiwi wa dang em hi ki ha ka Council namo da e cha kiwi tawon ki bru mo ki seiñ namo?” da kylli u Rikut.

Chooh chooh da khyrngiat u wa heipor wa kylli u ha ka Dorbar Tlang lada em ki thaw wa da e ka Council cha ki bru samen yeiwa da yoh jubab u ym em tangwa ha ka Dorbar Ly’ur won da kylli kamni i jooh heiwa ka JHADC da e ko ya ki 132 tylli ki yung wa ki thaw cha ki bru samen wa ki seiñ wei ini da ong u pynyoo i wa ka Council da jubab tangdep donhi ko.

Heijooh i por da ong u wa em chiboon iwa kwah u wow kylli hapoh ka dorbar heiwa iwi na ki toh wow tip katwon tylli ki jaitbru wa da tipmit ka Council hapoh Ri-loom Jaiñtia wei yeini iwa kylli u da chah kyntait i deiwa ong wym em che i.

Related posts

Chah kem 8 ngut kiwa slaitbor ya ka khynnah wa dang 15 snem deiwa rahbor ka heipor wa lai mihlait

January 11, 2026

I yap u Garo toh neidaw wym ye ka sorkar wow pynsangeh yei tih mar pohkhyndaw pyrchah aiñ: BJP

January 11, 2026

Hajrong kini, u Rikut da ong u wa ka dorbar ka JHADC toh kawa leh tangdep wei leh yabor.

Da sñiawkhia u leh yeini i rukom pynman ya ka dorbar kawa ym em u e laad bha ya ki MDC wow yaklam ki hajrong ki mat wa emkaam ya ka Council wa ka Ri-loom Jaiñtia.