Kat dang lai ki sngi dang jan leh ka Election MLA wei i mih i psiah seiñ dang joor i wei ynne ka sngi ka NPP Umsning Block da rap khlan ko deiwa psiah u Jason S Mawlong, MLA warim ka PDF wa u Donkupar Sumer, MDC warim ka UDP.
Ya kini ki ar ngut kiwa yahkhmat ka Umsning Constituency da pdiang sñiawbha cha ka NPP da ki waheh ka Party kam u Dr. WR Kharlukhi uwa man u State President, u National President u Conrad Sangma, u National Vice President u Prestone Tynsong, ka Ampareen Lyngdoh MLA warim ka Congress, Sniawbhalang Dhar, Montri sorkar wa kiwi kiwi.
Hawa klam ha kani ka sngi, u Jason S Mawlong uwa man leh u kyrtong ka NPP na Umsning da ong u wa ha ki 5 snem wa da yoh u kreh neibynta ka Constituency toh nei kyrkhu ki heh ka NPP wei da ong u wa u Montri Rangbah wa u Symbood Montri Rangbah ym jooh kyntait ki kat ya iwa paan u.
Ha kani ka sngi da yoh leh i klam na u heh ka NPP u Conrad Sangma uwa da beiñ ya ki seiñ kiwa da pynbaad ya ka sorkar MDA.
Da ong u wa hanla pynbaad ki katwon katwon leh ya u Montri Rangbah wa ya u Symbood Montri Rangbah, tangwa ka sorkar toh biang ko wow man ka yong yong NPP hadien ka Election MLA 2023.
Ha kani ka sngi da pdiang burom da yoh leh i klam na u Prestone Tynsong, u Donkupar Sumer wa kiwi kiwi heiwa da em da ki hajar ngut kiwa poi wow sakhi wei wow ap.
